Bertso berriak udaberriz jarriz

Aurre, Jon

 Anboto elurretan

 Eta Oiz zuri

 Gorbea ametsezko

 Mendien irudi

 Artxandan belar puntak

 Jaioberri guri

 Abrako haize hotzak

 Labana dirudi

 Arkazi bilutsean

 Bi txinbo urduri

 Hor goiko haitz artetik

 Garden dator ura

 Bere bidean doa

 menditik mundura

 Basotik hiriraino

 Nahi gabe heldu da

 Abisu bat darama

 Sekretu modura

 Martxoko zozoaren

 Kantu zoli hura

 Eguzkia irribarrez

 Azaltzen denean

 Bizitza asmatzen da

 Berriz oihanean

 Lore zuriak jaio

 Lur beltz gardenean

 Nobedadea dago

 natura denean

 Erleak ere hasi

 Zaizkigu lanean

 Eraberritza honen

 Testigu gara gu

 Aldakuntzaren mezu

 Bera daramagu

 Eguzkia goiz dator

 Itzali berandu

 Hontaz ohartzen denak

 Zer esanik badu

 Egunak irribarre

 Zabalagoa du

 Nik ere zerbait berri

 Barruan dudanez

 Behin sentitu ezkero

 Zergatik esan ez

 Ia ito gaituzte

 Lege eta lanez

 Inorentzat gabiltza

 Onena emanez

 Txorimalotu gara

 Bizidun izanez

 Kontseiluak ematen

 Zebilek inori

 Norbaitek esango dik

 Bukolikoori

 Zerbait dinolakoan

 Konta edonori

 Artzain arora zaigu

 Nahi gabe erori

 Modaz kanpo nabilek

 Bazekiat hori