Barru barrutik sei bertso berri
Aurre, Jon
Sentimenduen zaldi gainean
noa izarretan gora
abiaduran abiaduran
poza nahi nuke gogora.
Malko zuritan urtu beharra
da gizonaren ganora
noalakoan geldirik nago
ezin mugitu inora
deuseztu zaizkit dimentzioak:
espazioaz denbora.
Piztietan den piztienorrek
maite du bere larrua
ez al duk inoiz entzun gau erdiz
lukiaren sokorrua?
Pizti modura baino ez dut nahi
agertu neure barrua
maitasun eza nabaria da
sobra daukat amorrua
nori deabru jaurtiko diot
jaiotzearen errua?
Izar zuriak neguke gauez
laino bitarte estuak
ezpata gisa xurgatzaileak
gainean gizon prestuak.
Gehienok gara ekinda ere
gizartean saihestuak
etxe haunditan dauden kuadroen
irudi ezereztuak
miseriaren putzuan daude
lan egin duten eskuak.
Lehorgunea ez dadin busti
egin bedi azkar nasa
itsasoaren indar bortitzak
estal dezake lur masa.
Ez jakinaren oihan hertsiko
hesparruan zihur natza
libertateaz mozkortu nadin
egin dezagun ur mahatsa
haitzen kontrara zipriztin bihur
buelta dezadan arnasa.
Ametsen mundu zoragarrian
sortuak izan bagina
sentitu ere ezin zitekeen
zorionaren premina.
Jaio ginenok bestela gara
geugan daukagu samina
gaur zizpuruka, bihar zotinka
aldatzeko ahalegina
barra mendiak gainetik dauka
zeru beltzaren urdina.
Lur lehorrera freskura dakar
haltzaren hosto berdeak
urregorriak egiten ditu
gizonaren ohoreak.
Arrain gabeko uretarako
ez ziren egin sareak
indarrak ere berdintsu dira
zaindu bakoitzak bereak
usain ditzagun diren bezala
bide ertzeko loreak.