Gure egunetako zebait arazori
Arriola, Jose Manuel
-1-
Beartsu eta aberatsen gain,
zar da gazte artekoak;
zenbat arazo gure artean
gure egunetakoak.
Sortzen dituzten miñak ez dira
danak atsegiñezkoak.
Guzti guztiak biotz xamurrez
konpondu bearrezkoak.
-2-
Naiz ta gazteak zaarren bizitza
ain atzerea ikusi,
gaztea bai da ikasia ta
zarrak ez gendun ikasi.
Bidezko al da arrazoi ori
zaarrak uzteko itxuri?
Aiten aurretik semeak iten,
iñoiz ez litezke asi.
-3-
Beartsuendik aberatsena
aurkitzen dugun aldia,
gure artean ba dala nago
alde ori moztu naia.
Beraz ba dauka nun usatua
duanak jakinduria.
Zarrak aintzako artuta ere
gazteak ba du nun saia.
-4-
Gizonak gora begiratzeko
griña ori berea du.
Gora irixteko egarri ori
berekin aurkitutzen du.
On asko egiñaz al bazenduke
gorengoena berdindu.
Baña ez tzazu zure aurrekorik
esker gaiztotan ordaindu.
-5-
Mundu erditik azken aldera
gerturatzen goazenak,
gera lengoa ta oraingoa
zerbait ikusten gaudenak.
Ainbat alde on baditugu're
leno ez genituenak,
lenago ere ba genituen
gaur bezin oitura onak.
-6-
Alderdi onak len eztakoak
gaur egunean ba daude.
Erosotasun arrigarriak
len eztakoak gaur geude.
Baña dirua joaten zaigu
nora dan berririk gabe.
Guzti oiekin bai al gerade
zorion geiagon jabe?
-7-
Erreztasuna toki guztitan
artu izan dugu alai.
Zalantzik gabe jakintza bai da
erosotasunaren gai.
Baña geiegi poztu gaberik
egon genezazke ernai.
Ikasitzea ona da baña
biotz pixka bat ere bai.
-8-
Etxean ere gaitza ba degu,
baitare aldamenean.
Zori txarrean biotz gutxiko
jakintza asko danean,
naiz ta sarritan alkartu arren
otordurik onenean,
jaki goxorik izaten alda
zerbait falta zaionean?
-9-
Esaera bat zarra ba degu
oraindiokan nagusi:
seme-alabak azi ta ere
zarrentzat nekeak bizi.
Aita ta Ama neke azpian
erosotasun da guzi.
Gazteak asko dakite baña
ori ez dute ikasi.
-10-
Aita ta Aman zori larria
izanagatik ikusi,
seme alabak ajola gutxi,
berena beti lenbizi.
Iñoiz etxean gauzak illunki
agertzen badira asi,
askatasuna bear dutela
eta dijoaz igesi.
-11-
Erbestekoa gutxi eztala
berdin gabiltz euskaldunak.
Bereak gaitu eta gurekin
nai duna in beza Jaunak.
Geiegirikan ez gaitu pozten
munduko etorkizunak.
Argi guztiak ixio ta're
alare bazter illunak.
