abenduak 21

 Kaskobana eman digute eta orri bat gure zuzenbidea idazteko. Sebastianek dio,

 horrela, zerbait gertatuz gero badakitela nora bidali gure errautsak. Jendea

 makurturik ibiltzen da lubakietan. Errendatze dokumentuaren bila balebil

 bezala.

Lubakiaren likiskerian

 EGUNSENTI gorriska, aizun, ilun

       pisutsu batean

         ortze belea buru gainean

   sutondoaren epeletik genian aldegin

       ordutik hamabost hiletara oroit dagit harehin

       behin eta berriz trangatzen

         (trangatzentrangatzentrangatzen)

       den

             fusil nabar bat eskuan

           plastiko gotorrezko kasko neurrigabe bat

       buruan

               eta bihotza etengabe zarrastatzen digun

       zauri lazgarria

               (odoltsu, ubel, higuingarria)

       dizkiat erraien barruan.

             erreparatutakoan —sniff—

           hamaikagarren malko gazia baitiat isuria.

                 ekaitza basatia, zeru hitsa

                       beltza soldaduaren bizitza

           bakartia, uholde hilgarria

             soldaduaren arima enkoniatu

           bere bihotz herratu

             bere fusil mailatua.

                 ttop, ttop

 zanpatu du euri istil aspergaitzak,

                                 aspergaitzak,

                                 aspergaitzak,

   (eta zeruan darrai ekaitzak)

   soldaduaren aurpegiera kaskarra

     hezetu lubakiaren etsipen nabarra,

         serios antza keinua,

             begirakune galdua.

         galdua pentsamendua.

     BooMMMb!!!

   jausia duk, jausia

       gaurko lehen bonba eztia

           dardarka hasi lubaki kaskarina,

             dantzan ene bihotz erkina

 —amaituren al duk nehoiz soldaduaren mina?—

             amaituren guda zikina?

       botako naun sekula

         metraila ttipi mardula

           lurrera? parkera?

               haritz zurezko kutxa maitera?

                 tarratarratatarratatatatarratata

           (tarratata metrailaren hotsa)

               lehertu da ene bihotza

               bertan berunezko bala motza

           HALLELUJAH! HALLELUJAH!!

               soldaduaren lana bukatua

                 bera eztiarekin elkartua

                     gainezka zegok kanposantua.

1600

 SEGUNDU asko ditun mila eta seiehun segundu

 aulki elektriko batean zain egoteko adibidez

 lore batzu eskuan ditunala zutik adibidez

 zaila dun muxu bakarra malgutzea hain luzaro maite

 metro asko ditun mila eta seiehun metro

 batez ere gaur eta kale urtu hauetan ihesi edo

 hire botanikan murgilduz gauaren barne lorategietan

 arratsaren zirujia ebakiz rosa rosae

 mila eta seiehun arratoi samaldan

 suizidatu hituen atzo Pekinen

 maitasunaren hiru osagaiak batzerakoan

 proportzioetan ondo asmatu ez zutelako maite

 asko ditun mila eta seiehun arratoi

 zorionaren zutabeak hortzez kurruskatzeko

 ez al zain hala iruditzen maite?

 kearen aritmetika urruna estazioetako oholetan

 esandako gezur guztiak kontatuz ere

 mila eta seirehun gezur

                               gezur asko ditu

 eta ez dun lain elurra abenduko murru izoztuetan

 gabardina tirokatuaren odola jelatzeko

 metrailaz baheztatua euria

 matrailetan mila eta seirehun berun pusketa

 berun pusketa gehiegi direla iruditzen zaidan