Zalaparta
Umea eta colt-a
Goizean, lanera nindoala,
kale erdian ume bat aurkitu dut,
arropa zahar eta apurtu batzuk zituen,
malkoen lorratsa masailetan
eta bere begi berdeetan
deskriba ezin den tristura.
Gero, lanera heldu ondoren,
ezin izan dut lanik egin,
umearen begietan ikusitako tristurak
ene bihotzeko alaitasuna estali du,
baina ez zen bere errua.
Gauean, lanetik irten eta gero,
umearekin topo egin dut
baina ez zuen tristurarik begietan,
iraultzarako behar den arma
eskuetan baizik;
colt zahar bat zen,
aurreko gerrate batean galdua edo,
munduaren geroa aldatzen lagunduko zuen
colt-a
Bihar, lanera joan aurretik,
nehor esnatu aurretik,
iraultza egiten lagunduko duen
neure colt zaharra hartuko dut
eta begi tristeak zituen umearekin
munduan zehar iraultza hedatzera
joango naiz.
Odoleko piztien dantza
Zainetan dudan odolean
mila pizti igerian dabiltza,
nik lurraren zainen odolean
noizbehinka, aintzina,
egiten nuen bezala;
begiak hertsi eta igerilari hauek
graziz mugitzen ikustean
ur dantza baten aurrean nagoela
alaiki pentsatzen dut,
baina dantzari hauek
biziaren eta heriotzaren dantza
pauso berdinekin dantzatzen dute.
Gaurkoa zein den galdegin beharko nien...
Trenari
Geltokien arteko bidean
trenak amets bat izan du.
Urte askotan bide berdina
egiten ibili ondoren,
burdinezko errailetatik
aske geratzen zela,
nahi zuen bidaia egiteko;
baina geltokiaren inguruetan
makinistaren txistu zorrotzak
bapatean iratzarri du,
jendea bere erraietan,
alde batetik bestera joaten,
tristeturik somatuz.
Laister
Laister helduko da bai,
herria esnatuko den eguna,
askatasunaren txoriak
gure lurraldearen aideak
hegaz margoztuko dituelarik.
Laister helduko da bai,
kataiak apurtzeko ordua
eta apurtutako kateak
galdaretan urturik
bakearen baratza lantzeko
nekazariek behar dituzten
goldeak eginen ditugu.
Laister helduko da bai,
arma hotsik gabeko gaua
maitaleek berreskuratzeko duten
gau ixil eta izartsua.
Laister helduko da bai,
aspaldi desiratzen duguna,
borrokara eraman gintuen
arrazoiaren ezeztatzea
lortuko dugularik.
Laister helduko da bai,
aintzina landaturiko haziak
ernetuko diren eguna.
Laister helduko da bai,
noizbait amets zena
gure herriaren egi izatera
eta ameslarien oroitzapenek
etsaien azpijoko guztiak
erabat ezabatuko dituzte.
Eta laister helduko den hortan
nire begiak hertsirik,
ametsak loakarturik
eta bihotza geldi aurkitzen badituzue:
nire begiek
umeen begietatik ikusiko dute,
ene ametsak
lunki esnatarazi, arren,
eta bihotza
bakean utz ezazue,
zuen bihotzekin bat eginda dago.
Arrazoiak
Ez dut ene arrazoien arrazoirik
arrazoiak izateko ez baitut
ez arrazoien beharrik,
ezta inongo
andere
edo jaunen
baimenik;
arrazoi hutsez egindako
arrazoi handi bat naiz.
