Bittor Fernandez

Erantzun 1

 Aberea pozik zegoen

 ximiño barruan lo.

 Haize bolada batek iratzarri du.

 Gure kaltez,

 Darwinen alde.

 Hor zauden norbaiten eskuak

 buruaren lainoa kenduz,

 pentsatzeko gaitasuna

 eta

 morroiaren katea ere eman.

 Zertarako ote?

 Zomorroa postuago bizi

 zuloaren iluntasunean

 ezerezaren jakitean,

 besteak izaten ez direlakoan

 eta

 inoren beharrean.

 Platonen kobazulotik ateratuak

 ematen dugu gizonok.

 Argiaren aurrean itsuak,

 edertasunaren aurkakoak,

 heriotzaren lagun betikoak.

II erantzuna

 Niregan aurkitu nahi nuke

 gaitasun eta erantzun guztiak.

 Ez mendiek, itsasoak,

 baserriek, zakurrek, ez gizonek,

 ez baitakite, ezin didatelako eman.

 Eta ihardesten badidate

 ez ditut ulertzen,

 ezta nahi ere.

 Sarritan nazka ematen dit nere buruak

 adimen jakintsu ez duelako;

 nere gorputzak ahula eta gaixoa;

 guztien arimak ezerezean murgildutak,

 askatasun iturritik egarriak ditugulako.

 Gauza guztien artetik bataz finkatuz gero

 galdutak hori deuseztatzerakoan.

 Ostera, dena besarkatu nahiean,

 ura hatzaparretik doakigu.

 Eta joanda harrapa ezak!