Futbolari
Uxola
1
Erriko futbolistak
gaur zuten partidu
eta izan nai nuen
jokoan testigu.
Sarrera ez zan merke
kostatzen da diru!
nekez irabazia
aixa juten zaigu.
2
Sartu naizelarikan
ta asi exeritzen,
orduantxe zelaira
mutillak irtetzen.
Ikusle batzuk txistu;
besteak, goratzen
zein baño zein geiago
eztarrik urratzen.
3
Arbitroak jarri du
pelota erdian
eta jokatzen asi
txistua jotzian.
Batek lagunai pasa
eta abiadian
atezaia jarri du
estutasunian.
4
Atezaiak pelota
urrun botarikan
pilloan jun dirade
arrapa nairikan:
batek burukin jo du;
bestek piririkan
lurrera jausi dira
teatro egiñikan.
5
Goikoak arrapatzen
Pello da mutilla!
Iretzat, Joxe! Ar zak
eder biribilla
Lopez'ek segi dio
-ez izan abilla-
azkenian eziñik
jarri zankadilla.
6
Olakotan jendia
jartzen da mamorro!
Deadar, txistu-otsa
eta makakorro
edozeiñen burua
eskaturik orok,
arbitroa geldi da
ez aza, ez porro.
7
Arbitroak ikarez
eman du zigorra
-guraso danez maite
dulako txilborra-
Pello da orain jotzen
ostiko mokorra
ai! ez ba-lu ateak
egur txit gogorra!
8
Iñaki'k egin dio
Joxe'ri txiripa
eta extremuari
bota irikita;
onek arrapatu du
egiñaz korrika
eta erdira bota
bonba atomika.
9
Iñaki an zegoan
baita Segurola
ikusirik etortzen
ixkiñatik bola.
Onek lepoa luza
ibai arranopola!
eta bala bezela
atean da «gola».
10
Besteak jarri dira
onekin asarre
gureak zeudelako
egiñikan parre.
Jokoa, bizitu da
bultza eta kolpe
asta kirten aundina
egiñaz alkate.
11
Jaunak! Aurre ta aurre
ba-doa Beloki!
Ate zaiaren aurrez
or dago bakarrik!
Ba-dijoa jotzera...
ta aldamenetik
Peru'k txonkatillan jo
errena utzirik.
12
Ezin genezaioke
egin ori bati
ta ori arbitroak
txit ongi ba-daki.
Gizatasuna dago
jokoan gañetik
orregatik txistuka
agindu penalty!
13
Penaltiak botatzen
Joxe ez da tentela!
Ondoan ditu danak
zaindari bezela!
Ezkerrekin jotzen du
malizi duela
berdintza ekarririk
jokoan onela.
14
Kanpotarrak giñan da
guretzat pozgarri,
ara gure errira
puntu bat ekarri!
Onelako garaitzak
ez dirade sarri
naiz ez ekar mesede
etxekandreari!
15
Amabost bertsoetan
azalduz futbola
esan nai nizueke
umorez nagola.
Tristea alaitzea
nai nukela ola,
ez litzake asarre
onekin «Uxola».
|