[Bertsotan]

Euskitze - Sarasua

 Euskitze

 Neskatxa baten atzetik gabiltz

 Jon eta ni bero-bero,

 ni patxaratsu saiatu arren

 Sarasua dabil ero,

 zuk zoriontsu izaterikan

 ez ezazula espero

 gauza guztiak ez dira lortzen

 dirua izan ezkero

 Sarasua

 Aspalditikan hasia naiz ni

 gizon aberatsa gurtzen,

 azkenerako indar den hori

 sekula ez bait da urtzen,

 berroiei urtez hasi zintezke

 zure zirriez agurtzen,

 dirua berriz denborarekin

 sekula ez da zimurtzen

 Euskitze

 Neskatxa baten atzetik gabiltz

 biok uda eta negu,

 gure ondora etorri dadin

 eginaz mila erregu,

 neskatxa hori da gure herrian

 polit guztien eredu,

 edertasuna izanez gero

 dirua lortuko degu.

 Sarasua

 Argiagoa izan zintezke

 ni bezelako bazina,

 emazte hori zahartzerako

 kenduko zaio bai grina,

 eta zuk segi gura badezu

 gorputzeko atsegina,

 diruarekin gerogo ere

 bada zeinekin egina

 Euskitze

 Nere neskatxa polita da ta

 hartuko luke pozarren,

 baina ez du maite haren dirua

 bakarrik izate arren,

 eskatzen diot nere ondora

 hurbildu dadila arren,

 edertasunik ez du izango

 zirujia egin arren.

 Sarasua

 Dirurik gabe gure bizitza

 gertatzen da oso latza,

 ta zuk dirua edo andrea

 hor dadukazu zalantza,

 zuk gerorako euki ezazu

 andrearen esperantza,

 nik askoz nahio berrogei urtez

 hogei urteko neskatxa.