Ni ez naiz gerraren zale, baizik pakearen alde
Peņagarikano - Lopategi - Amuriza
Peņagarikano
Gure mundua ere
hain dago itsusi,
elkar ere ezin
gerade ikusi,
ez naiz gerraren zale
zuen adierazi,
horrek ekarri ditu
hainbeste desgrazi,
gu zazpi probintzi,
horra nere iritzi.
lapur ta polizi,
zenbat injustizi,
alkar maitatuz ezin
al leike bizi?
Horrek sortu dizkigu
makina oztopo,
hau esanagatikan
ez naute joko,
hori Xenpelarrek behin
esan zuelako,
geroztik hari kaso
egin behar zako,
maltzurkeriz bapo,
nortasunez flako,
gerra zertarako?
hondamenerako?
lagunurkoa maite
ez dugulako.
Deabruei hartzen diet
urrutitik usai,
nik beti joan nahi nuke
pakean itzai,
entzun dira hildakon
hainbeste hil kanpai,
eta espaloietan
gaurkoz odola blai,
hurren zenbat etsai,
gu hondatzeko zai,
bota dituzte bai
tiroz hainbat anai,
horrela bizitzerik
guk ez dugu nahi.
Lopategi
Pakearen eskeintza
egiten dute hor,
eta dei horrentzako
ez nago entzungor,
justizi on batekin
gura genduke lor,
baldin bagera euskaldun
baldin anai ta nor,
horretan alegin bat
ez ote degu zor.
Izango ote gara
hainbesterako din,
gerrak ekarri digu
denontzat hainbat min,
pake itxaropena
orain gugana jin,
anai bezela denok
egin dezagun zin,
jokatuko dugula
zintzo, garbi, ta fin.
Amets hori lortzea
gertatu leike gaitz,
mugitu behar ditut
gaur harri eta haitz,
euskaldunak pozteko
noizpait pakezko jaiz,
gerraren burundia
naiz eta azaldu maiz,
ni pakearen alde
beti joango naiz.
Amuriza
1
Hortxe doa orain jaunak
nere lehen sakea,
Xenpelarrek aitortzen zun
etsaien atakea;
mendez mende izan dugu
hemen sua ta kea,
Gernikak ere ikusi
zuen errematea.
Baina ez naiz horren zale
ta non dago atea
gerrari irabazteko?
Hortik dator pakea.
2
Nork ez daki gure lurrak
zenbat karga dakarren,
gai horrekin hor tiroka
ez hadi jarri arren;
Euskalerria badabil
bi hankakin ta erren,
guk libre behar genuke,
sorginak akelarren,
begi bata ere ia
gal nezake pozarren
besteakin pake eder
hori ikustearren.
3
Xenpelarrek bihotzean
bazuen nahikoa min,
bertso hori kanta zuen
bere hortz eta agin.
Baina pake hori nola
sor liteke noiz jakin,
alperrik da hemen odol
danak hola irakin
pake hori helduko da
gerra irabazteakin
nahi duenak aditu du
eta isildu nadin.
|