Entzuteko guziak

Lexo

 -1-

 Entzuteko guziak

 eztira entzunak,

 zertara jartzen diran

 gizonen zentzunak.

 Asko izango gera

 illundu gaitunak

 konsideratu beza

 biotzikan dunak.

 -2-

 Bazterretan jarriko

 dira esamesak,

 batzuek itz zuzenak;

 bestek aldrebesak.

 Zenbait aurtxorentzako

 akabo babesak!

 lege bapoa jarri

 dute ingelesak.

 -3-

 Ama baten sabela

 il-tokien pare,

 ezin det au idatzi

 negar egin gabe.

 Bizi dan edo leiken

 aurtxoa ill trebe,

 gauza lotsagarria:

 abortua lege.

 -4-

 Bi sendagillen pirmak

 aski ortarako,

 eztet ulertzen ori

 egiz zertarako.

 Ezpadituzte beintzat

 artxibotarako,

 presupuestu egiñaz

 gastuetarako.

 -5-

 Abortuen gastuak

 Gobernuak paga,

 apenas jarko duten

 ortarako traba.

 Azi ta ezitzea

 gastu puskat bada,

 jaio gabe errenta

 garriagoa da.

 -6-

 Legez kanpoko aurrak

 nunbait erruz sortzen,

 gizonen utsegiñik

 ezpaita agortzen.

 Estaduantzat orrek

 gauz onik ez lortzen,

 eta errugabeak

 asi da zigortzen.

 -7-

 Eta orra asmatu

 bide dotorea,

 aurrea artu baño

 zer gauza ebea?

 Prutu eman eztezan

 ondatu lorea,

 diruai eman; aurrei

 kendu balorea.

 -8-

 Etzuten arkituko

 gaizki zenbait damak,

 ezpaituzte ola

 galduko on-pamak.

 Lege barruan kendu

 txar zaizkien zamak,

 zertarako ditugu

 orrelako amak?

 -9-

 Errez jarri diteke

 bat negar-jario,

 au pentsatzen jarrita

 zintzo ta serio.

 Zenbait aurren biziak

 betiko adio,

 txanpon bi baño geio

 eztute balio.

 -10-

 Zer ikusteko gauden

 eztakigu aurki,

 orra azken berriak

 bertsotan laburki.

 Jauna, eztezakezu

 zuk ontzat eduki,

 gizon pekatariok

 gaitzazu erruki!