1975, emakumearen urtea

Iraola, Rufino

 -1-

 Emakumea gizonezkoen

 mailan behar dugu jarri

 Nahiz eginkizun desberdinak

 naturalezak ezarri.

 Mendeko ez du inoiz izenda

 baizik bere osagarri

 Bakoitzak ditun bereiztasunak

 eskeinitzeko elkarri.

 -2-

 Naturalezak bere legea

 bakoitzarentzat emanik

 Ez pentsa gero uste deguen

 bezain bizkorrak geranik.

 Ez genezake inolaz bete

 batak bestearen lanik

 Bereiztasunak ez du esan nai

 bitan bat nagusi danik.

 -3-

 Gizaarteak emetasuna

 aitzakitako ibiliz.

 Debilagoa den izenean

 lan errexenak eskeiniz

 Emakumea arduratu da

 etxeko lan da familiz.

 Aginpidea gizonezkoen

 eskutan beti ipiniz.

 -4-

 Emakumea fabriketara!

 garai baten zeinek esan?

 Naikoa zuen ikasitzea

 zerbait josten eta plantxan

 Eta etxeko lanak egiten

 esku onekoa izan

 Horrezaz kanpo haurrak eginda

 haiek zaintzea aski zan.

 -5-

 Ideia honek hain bat urtean

 gizartea du ostatu

 Eta ez alda uxatutzea

 Jaunak, gehiegi kostatu

 Pentsa-molde bat ezin diteke

 gainera golpez gastatu.

 Baina badator piskabanaka

 nahiz denei ez gustatu.

 -6-

 Seksu aldetik ere galtzeko

 guztia berak darama.

 Deskuido batez erortzen bada

 galdu du betiko fama

 Amaika haurrek ezagutu du

 senar gabe bere ama

 Ez erdibana, egin bezala,

 partitu balute zama.

 -7-

 Emakumea gizaartean

 bere mailara jasorik?

 Sekula ere etzaio egin

 aurten hainbeste kasorik.

 Eskubideak izan ditzala

 behar bezala osorik

 Piska batean ez da aztuko

 ONU-k eman dun pausorik.

 -8-

 Berdintasuna eskatzen duzu

 ez duzu nahi mirabe.

 Justiziazko eskaria da

 konturatutzen gerade.

 Zu zenbat eta gorago igo

 orduan da denok hobe.

 Baina prakak ai! jazten dituzun

 Gizonak erantzi gabe.