Minbizia
Aierbe, Jose
Nola edo ala bukatu bear
mundu ontako bizitza,
jaio giņanok or degulako
ain beltz zaigun eriotza;
nekez da ona izatea nai,
orren atzetik gabiltza,
Baiņa Jaunaren esku dago-ta
berea da azken itza.
Naiz garraztasun asko izanik
berez il bear bakarrak,
ori gogoan degula bizi
gera emen mundutarrak.
Gazteak noiznai, ta eskaporik
ortik ez daukate zarrak,
ikaratutzen gaituana da
ainbat supritu bearrak.
Ia iņola ezin igaro
degu oraintxe egunik,
belarritara iritxi gabe
minbiziaren izenik.
Eta bai al da entzundakoan
dardar egiten ez dunik?
geien kezkatzen gaituan gaitza
dala esango nuke nik.
Aitatu utsak sortzen baitigu
otzikara gorputzean,
ortik pentsatu zor izango dan
geuregana etortzean;
zoritzarrean alakorikan
gertatutzen dan etxean,
pixkabateko irabaziak
laister dituzte utsean.
Alegin danak egin ondoren
lortzen danean, gaitzerdi,
sendatzen dana ba-dualako
berekin zerbait alderdi;
baiņa gaitz onek jotzen duanak
izanik ainbat pikardi,
erremedioik ezta alperrik
bai diru ta bai izerdi.
Sendagillea asten danean
ezer osan nai ezikan,
galdetu eta geronek ziur
ez dakigu oraindikan;
obe bearrez egingo dute,
nik ez dakit zergatikan,
dakitena da, andik aurrera
ez dala izaten onikan.
Munduan diran jakintsu trebe
ospetsu eta aundiņak,
ondo dakigu, ari dirala
urtu bearrean muiņak.
Sendagaienbat asmatu nairik
sendatzeko bizi-miņak,
baiņa ez beti egi biurtzen
gizonaren alegiņak.
Aurrera erruz egin dutela,
ez dago esan bearrik.
artu dituzten neke ta lanak
danak ez dira alperrik;
jakintsu oien buruan dago
pentsamentu au bakarrik,
egun batean lortuko dala
ezpada ezer okerrik.
Ojala gutxi paltako balitz
egun ori irixteko,
bearrean da, estu daudenak
batez ere, lasaitzeko.
Gaitzaren mende aurkitzen dana
zuzenean sendatzeko,
eta sanoak, kezkarik gabe,
lasaiago bizitzeko.
Erremeioa nun billa leiken
ain gaiztoa da asmatzen,
izan leikenik ere askotan
ezpaizaigu iruditzen;
nere buruak une onetan
orra zer duan galdetzen,
orren kontrako belarrik iņon
ia ez al dan jaiotzen?
Iņork etzaitu begiz ikusten,
eta dirudi gezurra,
ain ikus-gaitza izanik nolaz
zu ainbateko maltzurra?
Zuretzat txarrik ezer ez da ta,
zorrotza dezu muturra,
txitxi xamurra bezela asten
dezu mami ta ezurra.
Entzun izan det, sortzen zaudela
gorputzaren barrenean,
lotan bazeunde bezela agertzen
zaitugula aurrenean;
baiņa etzera zintzo ibiltzen
beti gure esanean,
esnatu eta asten baizera
gaitz egiten zuzenean.
Zertan ez dezu lotan irauten
gu bizi geran artean?
ez al dakigu esna egoterik
ez daukagula batean?
Gero zuretzat izango gera
emengoak egitean,
bienbitarte utzi zaiguzu
xomorro, arren, pakean!
Konturatzen naiz au izan dala
amets bat balitz bezela,
eta parrezka egon diteke
gure xomorro txepela;
esanaz, oiek uste al dute
orren txoroa naizela?
janari otzik etzait gustatzen,
naiago det jan epela.