Gazte baten aitormenak
Aierbe, Joxe
Gazte batekin hitz-aspertu bat
egin berria nauzute,
agian, naiko arrigarria
irudituko zaizute.
Nik ez nuan behartu,
bera bait zan ausartu;
nork entzuna behar dute
esan zidanen berri guztiok
laister izango dezute.
Askotan esan oi degu gazte
denboran nola sufritu?
Baina guk uste baino geiagok
naiz hala ez iruditu.
Badituzte, bai, penak
eta dituzten denak,
barruan ezin kabitu,
geientsuenak kontatu arte
mutila etzan lasaitu.
Jakin ezazu nagoela ni
ogei urtetik pasia,
eta ikasi nezakeena
aspalditxo ikasia.
Baina nun dago lana:
beharrezkoa dana,
nun dago irabazia?
Horrela pasa behar al degu
gure bizitza guzia?
Badakit batek baino geiagok
alpertzat hartzen gaitula,
eta, onenean, zuk ere gauza
bera usteko dezula.
Lana egin nai degu
kupirarik eztegu;
dunak eman dezaigula,
proatu gabe zer geran, inork
eztu jakingo sekula.
Noiz arte eztakit, baina gaurdain
bizi naiz gurasoekin,
ai zer nolako etorkizuna
daukaten haiek nerekin!
Mantendu eta jantzi,
naikoa penitentzi,
gaurko bizimoduakin;
nik bitartean irabaztea
oraindik zer dan ez jakin.
Dirua eztet sekula ere
itsu-itsuan gastatu,
norberarena eztanarekin
ezin daiteke jostatu.
Zintzo ibili arren,
poltsatik beti erren,
eta hori naiz ez gustatu,
al dun guztia ematen dunai
nola geiago eskatu?
Nere guraso maitagarriak
ia eskolarik gabe,
askoz lenago eginak ziran
beren buruaren jabe.
Hamalau urterekin,
lanari zien ekin;
naiz nik jakin haien doble,
haiek orduan egin zutena
egin banu askoz hobe.
Era honetan ni neu bakarrik
nagonik ezazu uste,
baina geienek ez dirudite
daudenik ni bezain triste.
Ez bait gera berdinak,
haiek buruko minak,
bai igande ta bai aste,
kentzeko beste erremedio
batzuk bilatzen dituzte.
Maite bat badet eta hor nabil
berarekin txoraturik,
ezetzik eztit esaten baina
gau eta egun kezkaturik..
Ez bada atzeratzen,
da beste bat bilatzen,
egoera ikusirik;
bene-benetan maite nauela,
hortan eztago dudarik.
Bizi-poza ta itxaropena
dijoazkigu gain-bera,
noiz arte iraun behar du honek?
hori da gure galdera.
Konpon bedi lenbailen,
berandutu baino len;
oraindik zerbait bagera,
bestela erdiak edo geienek
betiko galduak gera.
Horra gazteak egin zizkidan
aitormen batzuk azaldu,
oso laburki esanak dira,
ezin geiago zabaldu.
Kezkati utzi nindun,
garbi hitzegin bait zun,
eta arrazoi ez al du?
Horrelakoak ez daitezela
inolako moduz galdu!
|