Gaur eguneko bidezabalak

Aierbe, Jose

 -1-

 Gaur eguneko bidezabalak

 sarritan dira gorritzen,

 zorigaiztoan, odol geiegi

 ari baita ixuritzen.

 Iñoren aurka ez det egin nai,

 baña neri iruditzen,

 amarretatik zortzitan ondo

 ez geralako ibiltzen.

 -2-

 Ba-dakit nere dei eskasekin

 ez det kenduko negarrik,

 baña nai nuke entzuleentzat

 ez izatea alperrik.

 Ainbeste lagun il da zauritzen

 ikusiakin bakarrik,

 jende-gitxitze askorik bada,

 ez degu gerra bearrik!

 -3-

 Ezbear askon gertakizuna

 dago gure eskuetan,

 geren erruak izaten dira

 beintzat momentu askotan.

 Adimen gutxi azaltzen degu

 zenbait aldiz buruetan,

 eriotz-zale gerok gerala

 ba-dirudi batzuetan.

 -4-

 Len esan dedan bidezabalak

 gerogo ta estuago,

 orko kamioi, kotxe ta moto,

 nunbait aukera ba-dago.

 Salla galantik ikusten degu;

 aurrera berriz geiago,

 oñezkoentzat lekurik ere

 oraintxe ia ez dago.

 -5-

 Ugaritasun ori baleike

 ez izatea onena,

 lotsik gutxien duena beti

 izaten baita aurrena.

 Nunbait oraindik ikasi gabe

 bidea dala danena,

 arrixku asko ditu berekin,

 baña ori ez da txarrena.

 -6-

 Nere iritziz auetxek dira

 gure etsai gogorrenak,

 ez-jakiña ta aundinai asko,

 arrokeri nabarmenak.

 Gau-illuneko ateraldiak,

 geixko beterik barrenak,

 emakumeak ere ez dira

 ordun lagunik onenak.

 -7-

 Edariekin, batez ere gu,

 gaudenean sasoituak,

 alakoeta ez gaude iñor

 atzera egiten oituak.

 Eskutan degun motorrarekin

 geure ustetan Jainkuak,

 ondorenean izaten dira

 sarritan emen kontuak.

 -8-

 Aundinai eta arrokeriak

 egiten ditu bereak,

 beti arrazoi degula uste;

 bi e guzien jabeak.

 Era orretan ibiltzen gera

 errespeturik gabeak,

 dana geuretzat artzen badegu

 nola ibili besteak?

 -9-

 Beste arrixku aundiko gauza

 azkarregi ibiltzea,

 ontzat iñola ez degu artzen

 iñork aurrea artzea.

 Alkarren leian naiago degu

 ortxe muturrak austea,

 obe genduke atzetik baña

 osorikan irixtea.

 -10-

 Bear giñuzken zentzu guziak

 sano ez ditugunean,

 arrixku latza dago gurekin.

 ta... argi aldamenean!

 Mendean bear genduken tresnak

 nai duna egiten danean,

 gauza onikan ezin itxaron

 ala gertatzen danean.

 -11-

 Zintzo ta zuzen ibiliarren

 okerra diteke errez,

 ta errezago buru-galduak

 jartzen bagera aurrez-aurrez.

 Erru duenak ordaindutzea

 bakarrik balitz ezer ez,

 baña sarritan kulpa gabeak

 uzten ditugu negarrez.

 -12-

 Norbaitek aintzat artu baditu

 orra nere iritziak,

 zenbat naigabe sortu lezaken

 jatorki ez ibiltziak.

 Ez al gaituzte errukitutzen

 or galtzen diran biziak?

 maita ditzagun geren buruak

 ta lagun urko guziak.