|
Euskaldun baten kezkak
Aierbe, Jose
-1-
Denbora asko ezta
oraindik pasia,
euskera osa naian
nintzala asia.
Zartzera zaillago da
gaztetan utzia;
burua ere leike
sobra gogortzia,
orain ezin ikasi
nai dedan guzia.
-2-
Gaztetan aukerarik
ez gendun izandu,
bear bezela ordun
ez ginduzten zaindu.
Oker ura kolpean
guk nola zuzendu?
Baña egoki asko
norbaitek esan du,
ikasteko beiñere
eztala berandu.
-3-
Idazten da irakurtzen
ezertxo ez nekin,
irakasle bat bear
biotz onarekin;
oraindik ba-dira-ta,
ba-nuen nerekin,
orrela ikasi det
zeozer berakin,
gutxiñak ere ainbat
bear luke jakin.
-4-
Nere jakinduria
utsaren urrengo,
egia aitortzea
obe da lenengo.
Bakarrik banintz kezkik
ez nuke izango,
baña euskaldun asko
nere gisan dago,
itzegiten jakin da
ezer ez geiago.
-5-
Oiek ola dirala
zer zaigu gertatzen?
nere iritziz oso
erreza asmatzen.
Idaz-lan asko asten
gera irakurtzen,
ta naiz denbora asko
pasatu pentsatzen,
erdi-baraurik sarri
gerade gelditzen.
-6-
Ulertzen ezteguna
guk irakurtzia,
esan diteke dala
denbora galtzia.
Euskera nai badegu
egiz indartzia,
eta zaletasuna
berriro sortzia,
onena izango da
trabik ez jartzia.
-7-
Euskera indar artzen
nai bada ikusi,
idazle ta irakurle,
bat egiten asi.
Ez gaitezela joan
alkarren igesi;
laisterka egitea
nai degu lenbizi,
eta oraindik oiñez
eztegu ikasi.
-8-
Idazleak egingo
didaten galdera:
zuen irakasleak
orain gu al gera?
Orri erantzuteko
ba-daukat aukera,
batere galdu gabe
ezertan denbora,
egin dezazuteke
beraren papera.
-9-
Idazteko garaian
au izan goguan,
zuen idaz-lana nork
irakurtzen duan.
Gogorapen orrekin
idatzi orduan,
ala oso denbora
gutxiren barruan
frutua emango du
nai degun moduan.
-10-
Irakurleok ere
esna lo-zorrotik,
al deguna egiñaz
geure alderditik.
Ulertzen ezteguna
artu iztegitik,
ainbat egin dezagun
euskerarengatik,
baldin maite badegu
biotz biotzetik.
|
