Bertsoak bertsolariei
Aierbe, Joxe
Berriro bertso batzuk
jartzeko asmoan,
gai bat aukeratu det
ona dalakoan.
Artu nai ba-lituzke
norbaitek gogoan,
bertsolariarentzat
dira oraingoan.
Bertsolariak daude
bi eratakoak,
idazlariak eta
aoz-aokoak.
Bi erata egiten
naiz egon bapoak,
aoz-aokoentzat
dijoaz gaurkoak.
Eskeintzen dizkizutet
dauzkaten almenak,
zuentzat nai nituzke
betsorik onenak.
Aipatu izan ditut
askoren izenak,
zuek baiño meritu
geio ez dutenak.
Bertsolari bikaiñak
ba-ziran lengoak,
txarragoak ez dira
bate oraingoak.
Asko ta geientsunak
mailla berekoak,
«EUSKERA» goratutzen
berak lenengoak.
Jai-aldiak egiten
dira aldi ontan,
ikastolaren alde
ia geienetan,
Naiz sari gutxi jaso
olako lanetan,
apenas daudenikan
bertsolari paltan.
Bertsolaritan ez det
uste dagoenik,
gure izkuntzen alde
egiten ez dunik.
«EUSKERA» bai al-dezu
zuk beste lagunik?
bertsolariak ainbat
maite zaituenik.
Euskalerrian ez da
izango erririk,
bertsolariak kanta
gabeko txokorik.
Pasa-azten dezute
moment goxorik,
zuek gabe ez baita
egiten pestarik.
Leku guzietatik
deika etortzeko,
bearrezkoak nonbait
pestak edertzeko.
Gogozoak ez izan
arren danentzako,
atsegiñagorik zer
euskaldunontzako?
Bertsolariak nontsu
an euskal-zaliak,
euskaldunak non diran
an bertsolariak.
Orra bi gauza iñoiz
berezi gabiak,
bat galtzen baldin bada
galdu dira biak.
Zori onean gurt
izkuntza laztanak,
oraindikan ez ditu
galdu doai danak.
Kemen gutxi, ori bai
len indartsu zanak,
argatik iraun-azten
baditugu lanak.
Itxaropenik iñoiz
ez dezagun galdu
egin bear deguna:
dagonari eldu.
Dakigunak itzegin
besteai zabaldu,
bertsolariak ere
ori egiten du.
Euskerak ba-dauka gaur
naikoa suerte,
bere urretxindorrak
zuek bait-zerate.
Galduko dan beldurrik
ez daukagu bate,
zuen abots goxoa
entzuten dan arte.
|