Batzuek geiegi

Aierbe, Jose

 -1-

 Mundu zar au daukagu,

 ikusten degunez

 naikoa aldrebes,

 zuzentzeko, oraingoz,

 itxaropenik ez.

 Irudituagatik

 ederra itxurez,

 sakondu eta jarri

 gindezke negarrez,

 batzuek geiegi ta

 besteak ezer ez!

 -2-

 Amerikak, batetik,

 bestetik, Rusiak

 dira nagusiak,

 beren mende arturik

 lurralde guziak.

 Naikoa izanarren

 ez daude asiak,

 illargira joan nairik

 ordabiltza biak,

 bitartean, lurrean,

 jendea gosiak.

 -3-

 Goialde ortan dabiltz

 proan gogotikan

 derrotxaturikan

 jakin nai nuke zenbat

 diru alperrikan;

 emen ezpalegoke

 dagon premirikan

 ez liguke emango

 olako miñikan,

 bertan ez al daukate

 zeiñi emanikan?

 -4-

 Illargi'n eta Marte'n

 norbait bizi danik

 ori dakienik,

 oraindik ez det uste

 iñor dagoenik.

 Inguratuak dira

 zerbait jakin nairik,

 tresna baliosoak

 aruntz bialdurik,

 bai ote dabilkite

 intentzio onik?

 -5-

 Egin dezagun kontu

 bizia ba-dela,

 lurrean bezela

 eta beren atzetik

 auek dabiltzela.

 Ezin pentsa an onik

 egingo dutena,

 beste aldera emen

 oituak daudela,

 kanpokoak naiago

 dituzte bestela.

 -6-

 Jainkoanak izanik

 bata ta bestea

 on da jakitea,

 ez duela iñork nai

 aztuta uztea.

 Duenak ez dunari

 zerbait ematea,

 maitasunaren bidez

 alkartzen astea,

 anai jatorren gisan

 bizi izatea.

 -7-

 Asko lezakeana

 emale txarrena

 beretzat nai dena,

 nola izan lezake

 olako barrena?

 Iñori ezin opa

 geiegi dutena,

 pentsatzen jarrita ere

 ez al da au pena?

 goseak dagonari

 emaiok jatena!

 -8-

 Aurrerapenak dira

 bai bearrezkuak

 eta bidezkuak,

 baña berekin ditu

 naiko arrixkuak.

 Onerako bezela

 dira txarrekuak,

 auetatikan asko

 alkar galtzekuak,

 sortuko ezpalira

 obe alakuak.

 -9-

 Gure aitonak sarri

 esaten zutena,

 il ziran... zer pena!

 baña ba-da esan bat

 aztuko etzaitena.

 Eskolarik ez baña

 asko zekitena

 denborak eman digu

 arrazoi onena:

 «Ene, aurrerapenak

 galduko du dena»!

 -10-

 Asko goseak iltzen,

 besteak gaxorik

 nolabait bizirik,

 ezpaitute ezagutu

 janari goxorik.

 Goseak ba-dakigu

 ez dula txantxarik,

 bizitzeko bai ote

 daukate pozarik...

 alakoari ezin

 eskatu pakerik.

 -11-

 Mixeri latza dago

 nazio prankotan

 nai baño geiotan,

 besterik gabe aski

 jarritzeko sutan.

 Ogia eskeintzea

 obe alakotan

 baña ez dute ori

 egiten askotan,

 baizik armamentuak

 ipiñi eskutan.

 -12-

 Ezin bizia baño

 lagun txarragorik

 ote da besterik?

 asarretzeko bera

 naikoa bakarrik.

 Ala dagoenari

 ez eman armarik

 ezpazaio egin nai

 iñori kalterik,

 bestela ez da paltako

 sekula gerrarik.