Joxe Agirre "Oranda"ri
Izazpik
1
Izarraizpeko kattagorria,
basoaren oihartzuna,
harrokerizko ikastetxetan
asko ikasi etzuna.
Lurrak dituen arrazoi sendoz
osaturikan zentzuna,
Euskal Herrian hamaika aldiz
gustora asko entzuna.
2
Izarraizpeko baserri baten,
harkaitzean sortu zan da,
orain arteko bertsolarien
sustraia hori izan da.
Iturri garden gozoetatik
bertsoen ura eranda,
hire eskola paregabea
sortu hintzaden ŤOrandať.
3
Egun batean lur sakonean
erein ziguten hazia,
udaberriko gazte haroan
loratzen gogor hasia.
Geroztik ez du jakinduria
liburutan ikasia,
baizik amaren bular gozoak
erantsi zion grazia.
4
Gaztetan hasi eta geroztik
herriz herri zenbait pauso!
Berez etorri ona duenak
kantatutzen du eroso.
Triste daudenak alaitutzeko
aparta izan haiz oso,
Euskal Herrian eragina duk
hamaika algara gozo!!!
5
Bertsotarako erreztasuna,
entzun-gozoa abotsa,
edozein gaitaz kantatutzeko
ez dana inoren lotsa,
arrazoietan apartekoa,
ziri sartzaile zorrotza...
alderdi denak aitatzekotan
etzegok zerrenda motza.
6
Omenaldia hartzeko, Joxe,
hik ez duk hainbat edade,
nunbait hirekin oroitu ditut
besteak baztertu gabe,
Jatortasunez eginik hago
herri-bihotzaren jabe,
aurrez zorion anaikorrenak
ikusten ez bagerade.