Oroimenez
Arriaran
(Nere ama zanari)
Orain iru urteraño
nituen bi ama.
¡Bat orain ta besteaz...
biotz miñen zama!
¡Oi! ¡Zer dan gauz illuna
amagabe bizi!
¡Iñork eztaki au zer den
ez badu ikusi!
Bere gelan an dago
aintzin oi bat utsik
ta "Kristo" oi gañekoa
ormatik zintzilik.
"Kristo" illun ark beraxek
ikus zuen iltzen
ta bere aintziñen bela
dal... dal... dal... ager zen.
¡Oi Ama zerukoa!
¡arren! nere amari
lagunduko al zenion,
ikustean larri!
Ta bere Ama baiziñan,
zaindari ta abaro...
¡Zure Jesus aurrean
galduko etzen txaro!
Orain iru urteraño
bi ama izanik,
¡orain umezurtz nago
ludian bakarrik!
¡Beragabe gauetan
sokalde txokoan,
zait iduri nagola
nonbait or... kanpoan!
Len labatza emen dago,
labe zarra ere bai;
katua, luze, etzanik,
txakurtxoa ernai;
bi mozkorren aurrean
eltzea gir... gir... gir...
Jaki urrinduna andreak
zartagian zir... zir...
"Zorionak" badirudi
zabaltzen dituela
denon gain egal zurik
aingeruk bezela...
Bañan miñ samiña da
denon biotzean,
¡zu... emen, ez baizaude,
ama, gure artean!
Orain iru urteraño
nituen bi ama.
¡Bat orain ta besteaz
biotzmiñen zama!
¡Agur ama maiteak
ta oroitu zeruan
semea baduzuela
Arribe inguruan!
|