Emakume beltz bati
Lasa Alegria, Amaia
Zanatearen kolorekoa da
zure azala,
beltz dizdiratsua.
Harlem-go emakumeen
arrazakoa zara
bainan
zure bizitza
handitasunez beterik dago.
New York-eko edozein
emakume zuri
baino ederragoa zara.
Gizaldiz gizaldi
zure beltztasuna madarikatu duten
zurien artean
ausartki
bizi zara.
Zure esku beltz irripartsuak
hamaika aldiz
ukatu dizuen
maitasuna dariote.
Ostadarren zazpi koloreen
laguna zarelako
azalen koloreek
ez dituzte
zure besarkadak
mugatzen.
Zure begi beltzen
goxotasun beroa
ez da inoiz hoztuko
agortuko.
Maite zaitut.
|