Hegal gardenak
Aurelia Arkotxa
Uhain beltza
itsasotik jalgi denean,
kurutzearen seinaleak
agertu dira ateetan.
Tximeletaren hegal gardenak
zain finez estaltzen.
Karrikak hetsi dituztenean
etxeak miatu
haurrak ere eraman
gure buruari galdetu diogu
ea Biziaren liburuan
markatuak ote ginenez.
Larrosaren petalak daldaraka
ihintzari idekitzen.
Egunsentiaren lehen pindarrari buruz
kanoiak emeki itzuli direnean
ixiltasuna hustu denean
dugu jakin
bigarren heriotza ere
aspaldidanik ukatua zigutela.
Ibaiaren mirail leguna
gero altzairuzkoak isladatzen.