Txinarrek
Gotzone Sestorain
Txinarrek
txinar neskei
landaretxo xamur direnetik
oinak niminoak izan ditzaten
gizon txinarren begiendako
lirainagoak eta erakargarriagoak baitira
oin normalak baino,
txinar landaretxo xarmantei.
oinak
benda mingotsetan biltzen
eta kristalezko oinetako hestu eta sarraskitzailetan
sarraskitzen dizkiete
oinak
oinatxo gera dakizkien.
Sartaldeko herrietan
ez dago txinarrik,
halabainan
sartaldean ere
gizonezkoen begiek erabakitzen dute
...................................
zer ez dute erabakitzen gizonezkoek?
Sartaldean neska emakumeak oro
iztar eta pantorrilo lehun eta bilutsiak
erakutsi ahal izateko
gizonezkoen begiendako
nesken iztar eta pantorrilo iletsuak
itsusiak baitira
tortura kamilan etzaten gara
eta ari izari guriaren tortura
eta bizarrak errotik tiratzearen oinazea
ezpainei kozkaka
pairatzen dugu,
gizonezkoei beraien gustoa egin behar baitzaie
bestela zokoratuak izateko arriskua baitugu.
Sartalde zein sortaldean
jaio orduko
maskara sinbolikoz jazten gaituzte
mundutarrek
eta mundutarren irudikeriek.
Zergatik
esaidazue
arren,
zergatik estali behar dugu gure izatearen soin bilutsia
bilutsi izateari uko egin nahi ez dugunean ere
zergatik?
Sortaldean zein sartaldean
ifarrean zein hegoan
hegaz hasi bezain pronto
hegoak mozten dizkigute
hemen sartaldean bederen
(anitzek hala ez pentsatuagatik),
eta sartaldeko sarraskiak eskobatzen ditu lau haizeak
eta sartaldeko hormen normek
eta prestigiozko lizentzi honoris kausa
prepos(es)tuek
eta debeku betebearrekoek
eta betebehar debekatuek
bendatzen dizkigute
lotarako orduak ere,
bendatu
eta bunker hermetikoetan sarraskitu.