Dagoeneko gaua da...
Gotzone Sestorain
Dagoeneko gaua da.
Lanetik etxeruntzean
Donostiako kale eta espaloi bustiak
zeharkatzen ditudanean
nere buru gainetik
koloretako argizariak
pinu eta gorosti argitsuak
zaldiz bultzatu gurditxo estatikoak
kapadun zaldunak ahairean kolunpiatzen
ikus ditzaket.
Eskaparateetan zoriona ere salgai,
ez dakit zeren truke baino,
eta farolaz farola megafonoak zintzilik
kantu hipokritez oinezkoaren bakardadea
eta leizea zuritu nahian,
eta iragarki, presiosoak
erosle zintzoaren patrikara eskuak luzatuz.
Zein mundu gezurtia!
Bapatean begiak biraka hasten zaizkit
eta ehundoko goragalea sentitzen dut.
Panpin nazkagarriok, arraultz ustelok!
Zuen zetazko soineko meheak, larruzko berokiak,
estopazko agatsa eta gomazko gorputzak
begietatik dagizuen likits berdez
barnizatuak dituzue.
Oriako likitsa eta kiratsa zarete.