Gaueko itzalen susmo ilunak...

Gotzone Sestorain

 Gaueko itzalen susmo ilunak

 astinduz,

 artizarraren zohardura

 haztatu nahian,

 ez dut aurkitzen hitzik

 nere bihotz-mina orbainduko

 duenik.

 Ele bakoitza, antzua,

 atzipetaz puztua.

 Jadanik nere kantuak

 ez du ahairerik,

 nere negar-zotin idortuak,

 malko minduen urmahel ahortua,

 ez du egarbera honen

 asetasun eztitsurik.

 Ez dut, ez dut,

 bakarrik

 bi gorosti-pipitte gorrien

 zorabiozko ihintz labaina

 nere, minberaz ezkotutako,

 aho maiteminduan.