Korrika 4

Lontxo Aburuza

 Maiatzaren azkena

 oi Atharratzetik,

 aterako da eta

 gainera gogotik,

 jarraituko du gero

 ifar-hegoatik

 Euskera izan dadin

 sendo eta zutik

 Nahiz ta pixkat kosta

 korrikan hastea,

 alai borrokatzeko

 dugu bertutea,

 praka motzez zaharra

 luzetan gaztea

 hizkuntza defendatzen

 har zazu partea.

 Ohar bat haseratik

 behar dugu egin,

 zahar eta gazteak

 dezazuten jakin:

 "ez omen da izango

 kontrol anti-dopin"

 beraz korri bezate

 monjak ere berdin.

 Apaizak ere dantza

 gaineko sotanak

 urrutira zabalduz

 KORRIKA'ren sonak.

 Bi mila kilometro

 ez direla bromak,

 horrela egin behar

 ezinez dagonak.

 Ateak jarri dira

 ongi zabalduta,

 zatoz langileria

 elkarganatuta.

 Aurkitzen ba zerate

 zerbait nekatuta,

 korri dezakezute

 astoak hartuta.

 Baldin ba zera morroi

 edo nagusia

 berdin Euskadin edo

 kanpoan hazia,

 hemen ondo hartzen da

 datorren guzia;

 KORRIKA hau bait dugu

 kolorez nahasia.

 Lanerako behar da

 dirua ugari

 premiazkoa dela

 horixe nabari.

 Deia zabaltzen goaz

 mundu guziari

 "Arnasa emateko

 gure hizkuntzari"

 Euskerari nolatan

 emango bizitza?

 Ondoren aipatzen da

 lehenen baldintza:

 "biziko bada gogor

 behar dugu mintza"

 baldintza honi eman

 dezaiogun hitza!.

 Jakin behar dugu hau

 hemen denok aurrez;

 zenbat kalte egin duten

 etsaiek indarrez,

 Ez dugu konponduko

 dolar edo urrez,

 baina etorkizuna

 dator irrifarrez.

 Lore berri askori

 hartzen diet usai,

 itxaropenez gaude

 indar berrien zai.

 4 garren KORRIKA hau

 izan dadin alai,

 KORRIKA da borroka

 ta aldi berean jai.

 Norbait erortzen bada

 korrika lurrera,

 lehen ere hamaika

 ikusiak gara,

 gogora ezazute

 hemen esaera

 "LEPOAN HARTU ETA

 JARRAITU AURRERA"

 Zuberotik hasita

 aurtengo KORRIKA

 bitxikeriak ditu

 berekin hamaika,

 euskera indartzeko

 manera polita

 eta guztiontzako

 HORTXEN DUGUN ZITA.