inprimatu
Hik iraun huen haize zital horietan zehar...
Izenburua:
Hik iraun huen haize zital horietan zehar...
Sinadura:
Joakin Balentzia
Urkizaren iruzkina:
Egilea(k):
Balentzia, Joakin

Argitalpena:
Korrok.
Urtea:
1984
Argitalpenaren urtea:
Alea:
5.zk.
Orrialdea:
40

Joakin Balenzia

 

 Hik iraun huen haize zital horietan zehar,

 lizarra, haritza, mendia, erraldoiemea;

 basoa mugitzen da jadanik gaztelua

 asaltatzeko kupidarik gabe; gaur da

 gerra bikain bat, oihuak, erostak, dardarak:

 herri honen alabak erakusten du bere benetako

                                                             tamainua.

 BEHIN "Esku zikinak" delakoa

 J.P. Sastrek idatzi zuen,

 eta geroztik guztiok geureak

 gehiago begiratu ohi ditugu

 BEHIN Iranen lapurrei eskuak

 oraindik ebaki egin ohi zizkietela

 irakurri nuen

 eta dardaratu nintzen

 BEHIN makina batek lagun bati

 eskuaren hatzak moztu zizkion

 eta neuk nolabait

 mendekutuko nintzela

 zin egin nuen...

 UNE HARTAN zergatik langileek

 ukabila altxatzen duten

 ulertu nuen betirako.

 

 NIRE BEHATZEK

 hire ile jorien artean

 nora jo ez dakite.

 Biziaren aintzinako misterioak

 altxor helezina bezala,

 hire buruak ezkutatzen ditu;

 eta altxor horren babesa

 hire adats oparoa da,

 laberintoa, ulergabeko mapa;

 azkenean baso ikaragarri horretan

 fereka galtzen da

 hire begiek ate esperantzagarri bat

 zabaltzen duten bitartean.

 

 


inprimatu