inprimatu
Sortu da goizaldea
Izenburua:
Sortu da goizaldea
Sinadura:
Joakin Balentzia
Urkizaren iruzkina:
Egilea(k):
Balentzia, Joakin

Argitalpena:
Korrok.
Urtea:
1984
Argitalpenaren urtea:
Alea:
5.zk.
Orrialdea:
34

Sortu da goizaldea

 

Joakin Balenzia

 

 Baina eguzkia irteten ahaztu omen da

 lurralde honetan.

 Lainoa da jaun eta jabe.

 Mendia dago berak poseditua

 gaua laburregi egin zaion

 maitale batentzat antzeko.

 

         Besarkatzen ari dira behiak,

 zaldiak, akerrak, bildotsak

 mendiaren magalean,

 eta nik ez dakit non nagoen

 mordoilo horretan.

 Bikaina dela, baietz. Natura

 helezin eta gertua, estrainioa funtsean.

 

         Ez dut oroimen luzerik;

 zorionez ene nazka hasten da egunero

 mendiarekiko estaldura lainoak

 utzi behar izan ohi duelarik

 eta abereak ikusten dira belarra jaten.

 Bihotza okertzen da eguzkia desiratzen.

 

         Azkenik hodeiek mantentzen dute

 lurralde honetako liluratasun goibela

 eta euriak, erregina ugalkorra,

 indarren oreka zaila inposatzen.

 Nik ez dakit non nagoen

 gatazka honetan,

 baina ez dut gainditzen.

 

         Hemen belarraren gizakizko usainaz

 ohartu naiz beroaren hezetasunean zehar.

 Sartzen dizu ibiltzerakoan,

 lurrin ezti eta samina batera,

 emearena antzeko.

 Belardietako lamia, Natura,

 erakarkor eta beldurgarria.

 

 


inprimatu