Andoni Salamero

—1—

 Huntz goiztarraren urrezko adarrak

 mendi jelatuari itsatsiak

 fereken ferekez, su garrez

 inguratuz, haren gorputz zuri esmela

 gorantza doa alde oro

 moldakortu nahian nahi egarriz

 hatz hori distiratsuak

 harat-hunat ekarriz

 eta bulkada eroen deman

 mila zizpuru eta intziri

 garraxi eroz, aiene gozoz

 amodio otoitzez baturik

 izerdi patsetan botatako

 ttanttan mardulak

 kristal labainkorrak bailiren

 puntta zuritik behera

 abiatuz, horma zuria urratzen dute

 eta elurra urtu egiten da

 barruan lurrean xurgatuz

 azken unean ur erreka bihurtuz

 bedatse berri baten eraginez

—2—

 Gau beltzetan ilargi betearen argia

 biltzear dagoenean, lorazainaren pausoak

 entzun ditzaket urrunean.

 Arrastaka darama zurubi bat eskuan

 beste eskuan, berriz, guraize zorrotza.

 eta lorazaina tipi-tapa, tipi-tapa eta klan

         burdinazko zurubitik gora

         klan eta klan, gora eta gora

                       zertara?

                       nora?

         Ilargira, berau inaustera.

—3—

 Negu pastean hodei beltzak

 tontor tenteak estali nahian.

 Negu partean tontor tenteak

 hodei beltzak barruratu nahian.

 eta biak bat eginik

       hasperen goxo jostari

             elur ekaitzez inguraturik.