Aralar'en
Zimelketa
Aurreko igandez juan giñaden
talde bat San Migel'era
Euskal erriko zaindariari
ikusi bat ematera
goizeko lau ta erdi inguru
beribillaren irteera
seiterdikin batetsu berriz
Uarte Arakil'era
andikan gora zear mearka
noizbait bertaratu gera.
Eleizaraño sartu giñan da,
ura zan gauza apaiña
aitortu eta jaunartzen ere
talde aundik alajaña
gosaldu gendun ondoren berriz
Meza nagusi bikaña
izlari ederra ederrik bada
izenik ez dakit baña
astindu zuen biraularien
ausardi griña zikiña.
Eleizkizunen bukaeran, ba,
erlikiya zuten jetxi
abesti samur zoragarriyak
bitarten entzun erazi
muñ emanikan irten giñan da
ba zan antxen nor ikusi
Telletxea jatorra ere
laguntzalle eta guzi
onespen on bat nai zuen nunbait
San Migel'gandik iritxi.
Ugartera jatxirik, bazkalduta
jendia tajuz jarriya
"Euskeraren Adiskidiak"
ain zuzen an jai aldiya
bertsolari bat ere bazuten
artarako ekarriya
nik ere zerbait lagundu niyon,
etzan almenez urriya
sarriyago ez ikusi bear
ain lagun maitagarriya.
Ondorenian jaun prestu batek
nau albotikan agurtu
"Larreko" zala jakitiakin
nere poza zeñek neurtu:
makill dantzari ta poxpoliñak
zeuden dantzarako gertu
pozez gebiltzen egiya esan,
¿zertarako ez aitortu?
baña garaya genduen eta
etxera biar biurtu.
Agur San Migel, agur Aralar
eta agur Naparrua
Lakuntza aldeko zelayak ziar
ura zan ibil girua
illunarekin urruti ga
giñan erri ingurua
egun ederra, egun alaya
atsegiñez igarua
Migel doneak eman deigula
danoi bere anparua.