Milla bederatzireun irurogeita sei

Zabala, Xanti

 -I-

 Milla bederatzireun irurogeita sei

 urteko uzta ontan ni ez nago lasai

 lenagore banuan nik zerbaiten usai

 gogorazaldutzen naiz gauza orren etsai

 -II-

 Guadalupeko Ermita da Ondarrabian

 itxasoai muxuka Jaizkibel mendian

 antxe izandu nitzan juandan Igandian

 Ama bisita gabe negon azpaldian

 ai zenbat aldaketa an gertatu dian.

 -III-

 Pentsa nun egitea Amatxoi bisita

 azpaldian ez nuan bera ikusita

 arritu nitzan gogor begira azita

 mordoskatxo bat bazan ingurun guzita

 bañuko traje motxak bakarrik jantzita.

 -IV-

 Len zan toki txukuna ta toki alaya

 Amatxoren ondoan pasatzeko jaia

 nork jarri du oraingo oitura lasaia

 deabrua eginda azpaldian saia

 lengoan arkitu det biurturik plaia.

 -V-

 Zenbaitek burua du betea aiziaz

 kontun ez da erortzen denbora luziaz

 betiko dala eder bere iritziaz

 plaian azki ez dala azturik guziaz

 or dabiltz beren gorputz oi erakutziaz.

 -VI-

 Ori ikusirikan nork artzen du poza

 jendea egitea era ontan goza

 or artu bearra da neurri bat zorrotza

 bateri-lertzen zaio ponetan biotza

 nun da errespetoa eta nun da lotsa.

 -VII-

 Berak lotzik ez eta besteai emanaz

 ortxe ibiltzen dira tankera otxanaz

 ondartzan bear diran trajik eramanaz

 oroitu bearrian Amatxo laztanaz

 lagun dira Luzifer edo ta Satanaz.

 -VIII-

 Arduraz egon nitzan batzuei begira

 lenen izkera entzun gero arpegira

 gauzak garbi esan nai izaten baitira

 nere kezka guziak or uxatu dira

 utsa extranjeruak bakarrak balira.

 -IX-

 Toki orrek bear du nola bait zuzendu

 gauz orrek oso gaizki ola ematen du

 Birjiñ kutsu gabean biotza eten-du

 lizunkeria ezin leiteke mantendu

 Guadalupeko Ama bestela ortik kendu.

 -X-

 Azkar egin bear da ortxe zirt edo zart

 eta neri orixe gaur bururatu zat

 lizunkeria kendu ta utzi Amatxontzat

 edo batekoz beste biak ezin beintzat

 alkarren inguruan artu iñork ontzat.

 -XI-

 Eroriko algera leibailen kontura

 eta Amatxoi kendu olako tortura

 biurtu zagun berriz eder, zan oitura

 txukundadez azaldu bere ingurura

 len zan bezin garbia utzi toki ura.

 -XII-

 Iñork ez badu artzen galerasten lanik

 gero ezta izango iñoiz zer esanik

 pieza bateko trajik beroak izanik

 zertxo gertatuko dan ondo badakit nik

 laister ortxe dauzkagu jantzita 'bikinik'.