Nere guraso maiteai
Tolosar bat
Euskaldun azi eta ezi nautelako
eskerrak emanaz.
Goibel zerua... lurra dardaraz...
aizea larri zebillen...
turmoi-danbadak entzuten ziran
tximist'izuen ondoren.
Ekaitzak nonbait, zirudionez,
ondamen latz bat zekarren...
Infernutarren kateak -nion
¿ote dira bat-bat eten?
***
Eraso beltzak gañez-eginda
laiño-pillak lertu ziran...
Une batzuk... ta ¿mendi-zelaiak
ibaiturik nork antzeman?
Ausiabartza nonnaitik: iñon
osatu-biderik etzan:
artega, kopet-illun zerua...
itsaso goikor bat, bean...
Gora begiak itzuli nitun:
¡ura zan ikuskizuna!:
gorputz jator dun Andre bat: zazpi
semekin Am'alarguna
tontor baten gain ujol-igesi
zegon: ¡lanbide ituna!
¿Noizko dituzu bes'ongilleok,
Erruki-uts zeran Jauna?
Ama gaisoa, len izandako
kemen sendoak auldurik,
laguntz'eskari zebillen: etzun
¡ai! bakardadea baizik.
Inguratua zedukan zaillak
sortutzen bazion pozik...
kutuntxo auek galdu ezkero
¿nora jaso al begi bik?
Urez estaltzen zijoan gaiña
norabiderik iñon ez...
une batean ama-semeak
agur alkarri esanez
betiko bana-ziran: utunak,
ego-aizeak autza lez
eraman zitun umeak: ama
bizi zan baiña.. eziñez.
Tontor-erpiña gurutze batek
zaitzen zun: aruntz etsia
jaso zituan beso-begiak
galdurik uste guzia.
Makur, isillik jardun zan: gero
gurutze bertan jarria
besarkatu zun eta Jaunari
eskeñi zion bizia...
***
Ametsa zan... bai... miña bederik...
¡ai! amets'utsa gaur balitz!
ez nitzake bein ametsegiñaz
beti jardungo garraziz:
begirikitze bakoitzan baiña
amets'ura dakust berriz...
¡Obe nuke il, ez bein, begiak
itx'iriki ainbat aldiz!
***
Entzun, ez aztu, Euskal-Semeak,
infernua esna dabil:
galtzeko zori bertan gaude, ta
pake-gurak beude isil.
Ama maite dun Euskeldun oro
gertu bedi guda-mutil:
¡Urru, irrintzi! baiña EUSKERA
iltzen utzi baño len... IL!