UNICEF-i
Murumendi
Hartu berria dut karta
UNICEFek bidalita
euskaraz eta espainieraz
dago idatzita
dioena ikusita
gelditu naiz hunkituta
ume-kopuru handiak daude
gaitzez estalita.
Kolonbia, Algeria
India ta Nigeria
Bangladesh eta Sudanen ere
bada mixeria
gaisoa eta, eria
nonbait dago ugaria
Munduak berritu beharra du
hauxe da egia.
UNICEF dator eskean
munduaren izenean
Espainiako ordezkaritza
dio azalean
mindurik hau barrenean
honek bere esanean
ez al dira gai ezagutzeko
gu geure senean?
ONU, UNICEF, UNESCO
hor Euskal Herria noizko.
geure zapaltzaileen izena
ote beharrezko?
behartsuei laguntzeko
esukaldunok gaude presto
baina mundua prest ote dago
gu geu aitortzeko?
Gauzak horrela direla
portaera da ustela
Nazio Txikiei ere zorra
badiezuela
utzi joera txepela
jar non bere txapela
orduan egingo dizuegu
harrera epela.
Alor honetan bestalde
zer ez ote bada galde?
mundu honetan hirutatik bi
goseak hor daude
misilak dira debalde
militarrak falta gabe
horiek alferrik xahutuen
beldurrez hor gaude
Sala ezazue Reagan
indarra badu beregan
Estatu Batu ta gainerako
akolitoengan
Berdin han Gorbachov hegan
bere sateliteengan
kanpoan gudak mantendu eta
pakea berengan
Horiek eta Frantziak
bai Britainia Handiak
Txina, Alemania ta bestek
dituzte graziak
eginik arma bitxiak
militarren gutiziak
diktadurak ongi mantentzeko
lanean guziak.
Munduan diru gehienak
armetarako daudenak
nazio txikiak zapaltzeko
gastatzen direnak
ezagutu herri denak!
ta eman denei berenak!
orduan gaisoz ez dira hilko
jaioberrienak.
Bakizue oraingoan
hemen garela mundean
Euskal Herria nazio dela
besteen ondoan
ordezkaritzak behingoan
jarri honako moduan
eta gu geure izenez deitu
bada hurrengoan.