Hiru mendizale hilei
Sarriegi, Andoni
1
Mila bederatzirehun eta
hirurogei t'hamaseia
Ekainak hogei eta zortzia
ez dugu egun lasaia
Hiru gipuzkoar mendizale
harkaitza igotzen saia
gailurrera baino lehen bazen
harri bat oso etsaia
2
Jose Luis Orbegozo zen bata
izatez azpeitiarra
Fernando Terradillos bestea
hau berriz ordiziarra
Sebastian Sanchez hirugarrena
ta bera beasaindarra
harriak huts egin da amildu
horra bada ezbeharra!
3
Huescako Torlatik aurrerago
Vignemaleko tontorra
Hiru bat mila eta berrehun
bat metrodun haitz zakarra
Hiruk aurretik igoa zuten
asmo bat zuten bakarra
guk ikusteko filmaz hartzea
atzekoen lan gogorra.
4
Aurrekoak gailurrean zeuden
atzekoak bazetozen
Baina harri faltsu bat libratu
eta hor dira amiltzen
Seireun bat metro goitik behera
eroririk dira hiltzen
soka, hiltze ta gainerakoak
heurekin jetxi zituzten.
5
Mendiko lagun ziren hirurak
lagun bezala hil dira
Sokaz elkarrengana loturik
batasunaren diztira!
Zeruko Jaunak bil zaitzatela
bere atseden tokira!
Ta betirako pizt zaiteztela
Haren bizitza argira!
6
Hogei ta bost urteko zen bata
eta andregaia zuen
Besteak hogei t'hamabi urte
emazte ere bazuen
bi haurtxo polit seme ta alaba
estimatuak zituen
Hirugarrenak hogei ta hamar
alargunaren seme zen.
7
Goibel daude hiru familiak
ta goibel mendizaleak
Goibel baitere lagun da ezagun
nola ez adiskideak
Hamaika tontor igoak ziren
betire gailur zaleak
Hiru lagun bikain galdu ditu
Euskal Mendi Batzarreak.
8
Bata ez nuen neuk ezagutzen
beste biak bai ordea
Hiru urtez batera bizi ta
nolatan utzi gordea
Ikasten elkarri lagundu ta
gero holako zortea
Nor norako gauden ez dakigu
bizitzaren dolorea!
9
Arrisku handikoa da noski
eskalatze mota hori
baina egiten duten ausartak
gogozko zaigu bai guri
Everest, Andes eta Alpetan
euskalduna da ageri
baina gutxien uste denean
amildu edo erori.
10
Euskal Herriak betire zuek
goraipatuko zaituzte
zuen ekintzak alde guzitan
kontatuko baitituzte
baina senditarrek hutsuneak
oso nabarmen dituzte
laguntzen saiatu behar dugu
nik beintzat hori dut uste.
11
Gaurko egunez dirua eta
ondasunak dira jainko
Horiengatik mugitzen baita
maiz alferra ere franko
Zuek zailtasunari heldurik
beti tontor da barranko
Denak egin zituen Jainkoak
dizkizue ordainduko.
12
Ezagutu zenituzten hemen
makinatxo bat mendarte
Lurralde desberdin ugari ta
makina bat harkaitz tarte
Kondairan begiratuaz gero
ez gaude oso aparte.
Itxaropenez bienbitartean
Agur! Egun handirarte!