Gipuzkoako Aurrezki-Kutxa probintzialari
Murumendi
Gipuzkoako Aurrezki-Kutxa
Probintziala izena
«Gaztetxo Elkarte» edo hobeto
«Club Juvenila» duena
Lehiaketa bat antolatua
Gabonaldian aurrena
eta jarraian irabazleei
sariak ere emana
Urtarrilaren hamazazpian
ikusia dugu dena.
Aurretik saridun ziren denei
etxeetara gutunak
horiek elebidunak baina
espańolez txartel denak
nonbait euskaldunok ez bait gara
kontutan hartzen garenak
ala erdaldunak ote dira
gipuzkoar jatorrenak?
edo ta horrelakoak ote
marketinglari direnak?
Egun horretan sari ematen
Jaun Prestuak genituen
Kutxak dotore prestatu eta
aurrean jarri zituen
euskaraz hitzik ez zuten egin
hala behar al genuen?
han bildutako euskaldun denok
ondo baztertuak geunden
martxa honetan umeak nola
euskaldun litezke hemen?
Ondorenean han eman zuten
«El hombre de la bestia»
filma erdaraz eta gainera
sorginkeriaz bustia
umeek ikusteko ez baina
izutzeko zen guria
osoro ikaratu aurretik
hartu nuen nik hastia
hiru umeak autoan hartu
ta uzteko Donostia.
Hau baldin bada, kulturarentzat
Kutxak eskaintzen diguna
pentsatzen hasi gaitezen eta
zorrotz dezagun ba luma
zer irudimen, sustrai eta sen
da hor azaltzen zaiguna?
denon diruaz tresnak pilaka
erabiltzen gaitasuna
esta Euskara ezkutatzeko
aparta trebetasuna!
Zertarako da propaganda ta
zertarako da luxoa
gero erdaraz egitekotan
festa-jaialdi osoa
ardi-itxurak eginagatik
barnean dago otsoa
Herria euskaraz zerbitzeko
ez da asmo erosoa
Euskara lehenengo ez bada
alferrik da hitz gozoa.
Bi hilabete dira oraindik
oso oker ez banago
«Kontuak Euskaraz» deitutako
kanpainarekin hordago
baina ondoren gaztetxoentzat
ikasbide hau hor dago
Non dira horko Zuzendaritza
Diputatu ta Bulego
baldin eta Euskara ez bada
itxura baino gehiago.
Hona ba zortzigarren bertsoa
gure Aurrezki-Kutxari
gaztetxoentzat erdara hutsa
erabili duenari
Merezi luke euskaldun denok
aurre ematea berari
Libreta eta Kontuetatik
dirua ateraz ugari
ea ba behingoz errespetoa
hartzen dion Euskarari.
