Mendigoizale
Deunoro
Giza-otsetik igeska nunbait,
bake-atsegin billaka
mendi tontorrak oinperatzeko
asmotan ba-da aneika.
Ixil mendiak, egutz-egotan,
danari dagiz uluka:
«Urduri nabil, noiz besarkatu,
maite dodana ixilka».
Barne-dei ixil guztiz emeok
laztantzen dabe gaztia,
bere muiñean sortu-eraziz
txera zurien ustia.
Geroztik, soin ta gogo damotsaz
esanik: «Zeutzat guztia;
bakarrik nai dot apain ta gordin,
gaur lez beti zu ikustia».
Zuk damostazu bakezko bizi,
itzal t'eguzki ugaria;
orlegi pitxiz oe biguna,
bertan atseden aldia.
Ipar aize mee, neure birien
sendogarri ta bizia,
neure adimen lurkoi onentzat
goitar arnari jakia.
Alkarren maite gara ixillean,
ta maiteak lez igandetan
zugana nator egarri biziz,
jarduteko barriketan.
Maitasunezko irri-barrea
dagerkizu ezpanetan;
zu ta ni aiña maitatzen danik
ba ete iñor baztarretan?