Jaunaren aintzinean
Salaberry, Etienne Joseph (So Egilea)
1
Buruan xapela emana,
Buruan xapela ezarria,
Arpegia haizerat, arpegia eurirat
Arpegia iguzkirat... berdin zako
Mendiak izan diten xuri eta latz neguan,
Ala ferde eta haurraren matela bezain goxo udaberrian,
Ala urrea bezain dorpe eta gorri udan eta udazkenean,
Ez da kexu
Axolarik ez du...
Kantuaren marmarika bizi ezpainetan
Irrintzinaren marruma lo zintzur kokorrean,
Ametsaren ilunbea zabal-zabala begi gainean,
Badabila, bidetik biderat, gostuan Euskalduna.
Euskal-herriaren jabe,
Euskal alor, zelai, oihan, itsasoaren nausi,
Betikotz egin du Jaungoikoak Euskalduna.
Amak erakutsi dio, hargatik bere amak altzoan erakutsia errepikatu
Eta Moisen harrian bezain barna zilatua:
Jaunari beha,
Jaunaren aintzinean bakarrik
Duela behar gizonak burutik kendu xapela.
2
Xapela buruan emana
Xapela buruan gora, hala nola bandera.
Ala ber-herrian ala atz-herrian
Berdin deskantsu, berdin laxo,
Iragaiten da Euskalduna.
Berdin deskantsu, berdin laxo,
Ala egun guzietako lau urratsetan
Ala besta-buruko kantu-dantzetan.
Ez da den gutienik jauntto larrien artean apaltzen
Ez da mikorik jende xehe ahalgaben erdian goititzen.
Mundua harentzat baratzea, nun baitaude lehen baratzetik
geldituak,
Zuzentasun, Askatasun, Nortasun, Berdintasun, Anaitasun, bortz
loreak
Eta gizonak bortz erhi da heien biltzeko betidanik ukanak.
Botidanik atxikiak heien errautsetik orratzeko
Erlea bezain erne
Bakearen eztia, ezti hauta.
Harek bezala bertze gizonek berdin
Aditu baitute amak amatik aditua,
Eta erraitearen-erraitearen bortxaz leloa hezurretaraino sartu
Jaunari beha,
Jaunaren aintzinean bakarrik
Duela behar gizonak burutik kendu xapela.
3
Polonesa Jaunaren aintzinean bakarrik belauniko emaiten.
Euskaldunak Jaunaren aintzinean bakarrik xapela kentzen.
Polonesak, Jaunaren aintzinean belauniko, gizonari hats berri
bat sakatzen.
Euskaldunak, Jaunaren aintzinean buru-has, gizona ixtiletik
jalgitzen.
Be ote dira Polonesak Jaunaren aintzinean belauniko emaiten
ez direnak?
Gizonen aintzinean belauniko ahuspez jartzen direnak
Be ote dira Euskaldunak Jaunaren aintzinean
Xapela kentzen ez dutenak?...
Badina,
Baiki trumilka...
Eta gu bakotxa, usu, noiz-nahi,
Jaunaren aintzinean ez gira belaunikatzen, xapela ez dugu
kentzen.
Gizonaren aintzinean gira belaunikatzen,
Xapela dugu jalgitzen.
Jauna, badakigu orain zendako ziren hiruetan erori belauniko,
ortzirale saindu egunean,
Zendako kurutzearen gainean atxiki duzun elorrizko xapela
buruari ausikian lotua.
Jauna, ezar-gizkitzu belauniko eta buru-has zure oinetan
Xutik eta xapeldun gizonen parrean
Jo txistularia, jo pilotaria, jo rugbilaria, jo fulbolaria, jo aizko
Jaria, jo arraukaria,
Jo bertsularia, jo dantzaria.
Gure esku-zartetarik sor dadila biharko goiz-argia!