Bidechka

Salaberry, Etienne Joseph (So Egilea)

 1

 Mendiari goiti, zampa-zampa

 Mendiari goiti badoha bidechka.

 Mendiari beheiti, lerra eta lerra,

 Mendiari beheiti, Jausten da bidechka.

 2

 Mendiari goiti,

 Harroken hegitik, oihanaren bazterretik,

 Zeruko itsas urdinari buruz

 Mendiari goiti, badoha bidechka.

 3

 Mendiai beheiti

 Bizkar gainetik, sorhopila erditik

 Dena ilhumbe dagon zipu leizerat

 Mendiari beheiti, jausten da bidechka.

 4

 Patar erditsutan

 kurru-kurru ari, hala nola urchoa,

 Patar zilho ohantzean

 Bada oroz ezagutu, iturri ezin hozpilagoa.

 5

 Har ditake hurrupaño bat,

 Ahoaren garbitzeko doia,

 Har ditake, bainan ezin geldi, ezin koka:

 Goiti abiatua, beheiti johan jadanik bidechka.

 6

 Zombat ardi, zombat potoka,

 Joareak ari irriz, edo nigarrez - nork daki?

 Zombat mutil gazte, zombat zahar

 Kantua dariotela, edo mutur,

 Ez dira ibili bidechkatik!

 Zombat ez dira ibiliko,

 Lekukotzat zerua eta leizea,

 Orai goiti eta sarri beheiti!

 7

 Bidechka, ez othe haiz gure bidearen iduripena,

 Mokoa luzatua, zerua jo artino,

 Buztana herrestan,

 Eror eta eror, ifernu leize zolaraino?

 8

 Zeruan iguzkiak iduri du adichkidearen begia

 Keinuka hasia, ez gaiten lokart, ez gaiten lotsa.

 Leizeko ibaiak igortzen daukigu orroa:

 Harek hartuak, harenak bethikotz.

 9

 Mendiari goiti, zampa zampa,

 Mendiari goiti badoha bidechka.

 Mendiari beheiti, lerra eta lerra

 Mendiari beheiti, Jausten da bidechka.