Pilota euskal jokoa

Alkat [Alkhat], Ernest (Ipar Haize)

 1

 Bidez bide nabilanean balio du ikustea

 Neure herri xume polita zertaz ote den betea

 Guzien gainetik, Eliza da xutik

 Ta gero arrabotea

 Hor bizi baita aspalditikan gure pilota maitea.

 2

 Sortu izan den pondu hartarik pilota euskal jokoa

 Ttiki ttikitik izaten baita horren ganako gogoa

 Behar da bihotza, harekin gorputza

 Beso buru ta zangoa

 Euskal-herriak bakarrik zuen horrendako nahikoa.

 3

 Gauza biribil gogor bat da delako gure pilota

 Bere ahalen indarrarekin nornahik lezake bota

 Eskuz ta xixteraz, eskuin ta ezkerraz

 Denetan joko polita

 Kintzea maizik nekez egina erretxago aldiz falta.

 4

 Euskaldunak bakarrak gaude joko eder horren jabe

 Geure lurra agertu baitzen su gar handi horren labe

 Zonbat pilotari, munduan ezarri

 Denendako balte hobe

 Euskal umerik ez da handitu pilotan arizan gabe.

 5

 Pilotarien ikusterat jitean kanpotiarrak

 Xoraturik dagotzinetan badira segur bakarrak

 Xahar ta gaztenak, pilotari denak

 Oi zonbat diren azkarrak

 Horiek oro Euskal-herriko arbol beraren abarrak.

 6

 Zonbat burraso ez ote dira oral hasten gogoetan

 Kirola, horren maitatzaleak gutti direla gaztetan

 Bihotz ta arimaz, berriz ditela has

 Izerdi hartuz kopetan

 Pilota zaindu behar litake herria salbatzekotan.

 7

 Joko eder heu noiz sortua zen nik ez dut ongi ikasi

 Denbora hartako jendeak zeru gainean dagotzi

 Menderen mendetan, ar gaiten pilotan

 Ez otoi hori ehortzi

 Sekulan santan ez baiginuke Euskal izenik merezi.

 8

 Euskal semeak barreiatuak mundu zabalean gaindi

 Beti aurrerat doa pilota, ez ditake nehoiz geldi

 Altxa eta harro, orai eta gero

 Airez aire ibil bedi

 Esanez bizi dela pilota, bizi dadien Euskadi.