Droga gogoan

Alkat [Alkhat], Ernest (Ipar Haize)

 1

 Mila hizkuntzen artean ere egiten bada hautua

 Mundu osoak ezinbertzean hitz bakar bat du batua

 Aments faltsuen iturria da droga dutena deitua

 Hoin garbia zen Euskal-Herrirat zorigaitzak du sartua

 Itxaropenak zabal dezala hasterat noan kantua.

 2

 Diru hutsaren morroiak dira droga horren nagusiak

 Gizontasunak dituen mugak dituztelarik hautsiak

 Anaiak hilez dituzte beti zuzentzen beren auziak

 Bihotzak duen maitasunetik sosak ditu biluziak

 Bainan errexki saretan sartzen ahulak diren guziak.

 3

 Maitasun faltan, lan eskasian laster bilatzen urtzoa

 Loa arina dagoenetan amentsak baitu gozoa

 Beti bertzea bide txarrean anaia edo auzoa

 Etsimenduak lanbrostatzen du drogatuak duen soa

 Ezin ukanen amentsetan du suntzitzen bizi osoa.

 4

 Drogatuaren ezinbertzea nahi izan dut aditu

 Gaztetasunak eman argia nola ote zaion histu

 Ustelkeriaz egin munduan mila arrazoin baditu

 Zuzentasuna ta justizia nahi luzke berez piztu

 Altxagarritzat droga hartzen du gero ezin da zutitu.

 5

 Herritarretan, etxecoetan, gutik dute konprenditzen

 Beren ustean ez delakoan bide beretan ibiltzen

 Gordean duen bortizkeria amentsez badu arintzen

 Nuklearrari edo gerlari gitarraz badu agintzen

 Porruak eman askatasuna ez baitu nihun aurkitzen.

 6

 Biziak duen handitasuna ainitzek egiten diruz

 Nortasunaren jabe ez dena betikotz leizean sartuz

 Zuri mintzo naiz orai gaztea osoki errespetatuz

 Ez dugu nehoiz deus aldatuko aments xoroak xurgatuz

 Bainan biziko mail guzietan egunero borrokatuz.

 7

 Zainetaraino senditzen duzu libertatezko gosea

 Nahiz txarra den aztertu gabe guzien kondenatzea

 Bilatzen duzun zoeon hura ez dago ezinbertzea

 Lehen pausua hauxe ditaike lagun batzu aldatzea

 Eta ustean etsai direnak lagunentzat onhartzea.

 8

 Naski geihegi agertzen da gaur ospetsuen parabola

 Onhart dezagun nahi ala ez droga gu baitan dagola

 Izpirietua nunbait daukagu, pozoindatua odola

 Batzuendako politika da, bertzentzat aldiz alkola

 Eta ez dea drogaren pare purua edo footbola.

 9

 Euskal-Herriko buraso onak gizon eta emazteak

 Zer ekar diro etxekoeri gure begien hesteak

 Denak ahulak denak erorkor batzuak ala besteak

 Ez kondenatu bainan zabaldu maitasunaren ateak

 Altxa ditzagun guk egin hutsez erori diren gazteak.

 10

 Hau edalea, hura alferra, bertzea aldiz ergela

 Gazten aldeko maitasunak du Apirilaren epela

 Guziak aldiz guri galdezka ezin eginez bertzela

 Elgar lagunduz joka gaitezen, gizondu gaiten horrela

 Sekula santan ahantzi gabe denak drogatzen girela.