Galai on bat

Txirrita

 1

 Kaso bat nai det adierazi

 nere intenziyo fiñez,

 arantza batek zulatutzen nau,

 nago sufritu eziñez;

 biyotzetikan maitatzen nuen,

 nobiya jarri zait miñez

 esperatzen det sendatutzia

 sayatuko gera ziñez.

 2

 -Agur etxeko andre leyala

 nola dago Manuela?

 bart arratzian enteratu naiz

 oso gaizki dagola;

 danak dakigu miñez dagonak

 asko sufritzen duela,

 sinista beza au adituta

 pena artuko nuela.

 3

 Lengo batian galdetu ziran,

 biyak izketan asita:

 -Ama maitia, nobiyuak noiz

 egingo otedu bisita?

 Berriz ez dala arrimatuko

 kasi jarri naiz etzita

 edo bestela etorriko zan

 orren aldian bisita.

 4

 -Juan dan berrogei egun obetan

 gaxua ordago oyian,

 atzo negonek lagundu eta

 atera zan doidoyian;

 -ez alniteke aurrera pasa?

 nago itz egiñ nayian.

 -Oraiñ lo dago, zuaz etxera

 t'atoz urrengo jayian.

 5

 Jayian juanda galdetu niyon:

 -Sendatu alda alaba?

 Erantzun'ziran: -txit ongi dago

 pasa zaitia salara.

 -Alimentua ekarri diyot

 artzeko moduan bada,

 tori ogi bat, botill bat ardo

 eta lakari bat baba.

 6

 -Gobernatuko degu alaba

 ez bizi arren aberetz,

 zuk ere zerbait egingo dezu

 ala pentsatzen det nerez:

 salda ona ta pastel goxuak

 emango diskagu berez

 ekaitzu oyek guretzat eta

 orri botilla bat Jerez.

 7

 -Beron alabak gusto ederra

 artzen badiyo jerezi,

 eman bezayo, eran dezala,

 ez nuen txarra berezi

 onek gaxuak despreziyorik

 ezdu nigandik merezi

 ¿nai aldu biyar ekarritzia

 beste pardel bat gerezi?

 8

 -Borondatia badiyozula

 orrek artzen duan poza

 baño gaxua fruta jateko

 oraindikan ez da gauza;

 zuk berriz ezer ekarri biar

 baldiñ badezu onunza

 ollanda pare eder bat eta

 dozenatxo bat arraultza.

 9

 Bere ollanda eta arraultza

 allegatu da garaya,

 neskatxa ere jeikita zegon 

 txoriya beziñ alaba.

 -Iruditzen zait badadukala

 zuri zerbait esan naya,

 itzalditxo bat nai badezu egiñ

 orantxen dezu garaya.

 10

 -Nekez etorri ziñadelako

 egondu nitzan etzita,

 ez da milagro miñez negonik

 etzenduen ikasita,

 biyotzetikan istimatzen det

 egin dirazun bisita,

 aldan maizena etorri zaite

 ez daude atiak itxita.

 11

 -Aldan geyena ebita zagun

 projimuaren pobreza.

 amoriyuak ekarri izandit

 zureganako nobleza:

 nai alzenduke egin dezagun

 Urkiolara promesa,

 nik pagatuta San Antoniyon

 biyok entzuteko meza?

 12

 -Segi dezagun biar bezela

 asi genduan lanian,

 gure gorputzak poztuko dira

 ura bukatzen danian;

 zertan kastatu birian edo

 janian da eranian

 meza ederra entzungo degu

 esposatzen geranian.