Arrantzale bat niganatu da

Txirrita

 1

 Arrantzale bat niganatu da

 gizon prestuaren gisa,

 Ezkion dagon ausuntu ortaz

 kantak jarri albanitza;

 itzas gañian omen darama

 bere munduko bizitza

 biyotzetikan maitatzen ditu,

 Jaungoikuak ta Eliza

 arren negarrak urrikalduta

 bayetz eman diyot itza.

 2

 Izugarrizko pasadizuak

 jaun orren diskit kontatu,

 orañ pena det ez nituela

 paperian apuntatu,

 eziñ kontala jende nola zan

 Ezkiyo-mendiñ juntatu

 pobre ta aberatz danak nastuan,

 errezatu ta kantatu

 aurten bizirik gelditzen dana

 izan liteke kontentu.

 3

 Ama Birjiña datorrian

 ikusten dute batzuak.

 berari beira gelditzen dira

 zabaldurikan besuak;

 gezurra dala kontari daude

 gaxto soberbiosuak,

 badirudite ardi leyala

 baten dabiltzan otsuak,

 eskarmentua sartu diye

 gure Jauna amorosuak.

 4

 Askotan ara juaten zerate

 sinismenikan gabiak,

 desanparatu nai dituzute

 Jesukristoren legiak,

 zuek desio dituzutenak

 ez dira askoz obiak,

 modu'orretan bajatutzia

 ez du merezi fediak,

 milagro on bat egingo digu

 zeru lurraren jabiak.

 5

 Nik sinisten det Jesus dagoela

 Altueneko graduan

 ta Ezkioko kontuak ere

 kasik alako moduan

 ori txantxetan etorri danik

 ez iñor artu buruan

 Ama Birjiñak ikusi arren

 jende asko inguruan

 oyek ez dute apuratutzen

 geyago dago zeruan.

 6

 Ama Birjiña askok ikusi

 Ezkioko larrian,

 jende franko juntatzen zayo

 iñoiz iñulabarrian

 ankak jartzeko tokirik iñork

 eziñ billatu larrian;

 Zumarragatik beraxiago,

 Ormaiztegitik urrian,

 Andua deitzen zayon tokiyaz

 Santa Luziko aurrian.

 7

 Oraindik ere, enpeñatzenda

 gu salbatzeko lanakiñ,

 sinistamen bat egiyazkua

 jarri nai luke danakiñ

 bire txarretan gabiltzalako

 sentimentu ta penakiñ

 gaxto guziyak gonbertitzera

 bere ejenplo onakiñ,

 gaurko eguneko batzuek baño

 luziagoko gonakiñ.

 8

 Orren semiak ez balu egiñ

 amoriyozko bixita,

 gaur oraindikan egongo ziran

 zeruko atiak itxita,

 zenbaitek gogor egiten digu

 ori esaten asita,

 guk ez dizugu sinistatuko

 ez genduan ikusita,

 orrelakuak egon litezke

 beren animaz etzita.

 9

 Amak badaki zerengatik zan

 Jesukristoren bixita,

 nola jakintzun ez da, egongo

 berak egin ta azita

 kulparik gabe eman ziyoten

 zenbait kolpe itxusi ta

 biyotz erdibi egin liteke

 arren planta ikusita.

 Kalbariyoko mendiyan illtzan

 gurutze batian josita.

 10

 Jesus'en Ama maitagarriya,

 Aingeruen Erregiña,

 zeruan sartu obegenduke

 inpernuan erre baña,

 gauzori guri adierazten

 bazabiltza alegiña,

 bera jetxita, negar egiñaz,

 ain dezu jeniyo fiña,

 guziyak ongi konbertitutzen

 badaukazu zer egiña.

 11

 Españi ontan bizi izanaiz

 iñoizka juanaz Frantzia,

 ni neonire zabarkeriyan

 urtia franko pasia,

 gorputza ala dakillenian

 animak daukan trantzia,

 gazte denborak aldegiñ ziran

 allegatu zait zartzia

 ondunitzan da esperatzen det

 zeruetara sartzia.

 12

 Urtian beingo konpesiyuan

 zabartutzia neguan

 Donostiyako Jesuitetan

 izandu nitsun lenguan,

 beldur beldurrak arrimatu naiz

 "Padre" zar baten onduan;

 galdetu ziran zer estadutan

 ibilli nitzan munduan

 bi "aguriak" ordu, erdibat

 gustora pasa genduan.