Hamaika brtso maitasunez
Isasi Balantzategi, Xabier
1
Neska zein mutilzarra
baldin bazerade,
ez utzi bertso hauek
leidu gabe,
ezkontzaren egiak
agerian daude
eta esango ditut
suabe-suabe,
ezkonduz behin ere
emakumea habe,
gizona zutabe
izaten dirade
baina zein da nagusi
ta zein mirabe?
2
Gazteak bizi dira
pozik eta alai
horrela segitzeko
ibili ernai.
Askatasuna ez da
jarri behar salgai
ondo bizi daiteke
betiko ezkongai,
baldin bazara gai
amodiori bai,
ibili jairik jai
hemen edo nonnahi
holan biziko zara
maitasunez blai.
3
Orain azalduko dut
zein den arazoa,
bertso hauen bitartez
nire mezua.
Aldareraino doaz
helduta besoa
hantxe entzungo dute
ezkon-errezua,
bidai goxua,
hurrengo kasua,
andra inozoa
ta gizon gaixoa.
Batu dira otsoa
eta usoa.
4
Hor daude erregina
ta bere printzea
errietan hasiak
bata eta bertzea
bakoitzaren desirak
nola gauzatzea,
bero bero dituzte
aurre eta atzea.
Lehengo kotxea
ta gero etxea,
hau da ezkontzea:
ezin asetzea
esklabutza elkarri
inposatzea.
5
Airean libre hegaz
dabiltza enarak
gizakiak ostera
baditu trabak,
etxean zein lanean
daude ugazabak
ta sufritzen ditugu
beroien zartadak,
galdu lengo gabak
betirako babak
gaueko izarak
eta adarkadak
tantean heltzen dira
seme-alabak.
6
Gogorra dela dino
neronen aitortzak,
otso horien kontra
ezin bildotsak.
Hori ezin du jasan
inoren bihotzak
ez bait dira entzuten
lengo muxu-hotzak.
Bero-ostean hotzak,
momentu mingotsak,
etxean arrotzak,
egia zorrotzak.
Infernua lurrera
dakar ezkontzak.
7
Ez dakit zein den honen
kausa edo zio,
gezur ala egia
arazo serio.
Ezkontzak bizitzari
kalte-egiten dio.
Hori holaxe dela,
edozeinek dio,
hamaika txilio
beste engainio,
ai! ze kalbario,
hau dela medio
elkarrekin jadanik
ez dira fio.
8
Ezkontzaren lotura
ez du inork behar,
hobe libre ibili
munduan zehar.
Zoriontsuak bitez
eme edota ar,
hortarako trabarik
ez beza inork jar,
lagunak bai, hamar,
ez andra, ez senar,
milaka ezbehar
ezkontzak bait dakar.
Barrezka hasieran
ta gero negar.
9
Hasieran daukate
bihotza kantari
ta berorren taupadak
dira nabari
holan gertatzen zaie
andra gizonari
denok daukagu eta
maitasun gurari.
Maitasun pagadi
edo arantzadi,
gorrotoren kabi.
Misterioa dirudi.
Gauza bat baino ez da
ta pertsona bi.
10
Urteak joan a(ha)la
dator desgrazia
goxo zena bihurtu
zaigu gazia.
Polita bazen ere
orain itsusia,
edonork dauka hori
sarri ikusia.
Maitasun hazia
Kupido-n gezia
bihotzan jausia
zimelerazia
maitasunak galtzen du
holan bizia.
11
Bizimodua ei da
gogor ta astuna
aitzitik, atsegina
da maitasuna,
denok bilatzen dugu
maitasun leuna,
atsekabe erdian
norberan kutuna,
behar den laguna,
berbaldi biguna,
maitalen jarduna,
zorion-eguna
eta guzti horrez gain
askatasuna.
|