Seiak bat
Iraola, Rufino
Ama beraren sabel ondotik
sorturiko senideak:
billatu nahiz gabiltza harek
seinalariko bideak.
Gure lurraren jabe badira
agin zorratzdun urdeak,
guk ere ezin beti eduki
sentimentuak gordeak.
Uste genuen demokrazia
zetorrela argitzera;
hainbat sastraka dagoen lurra
betirako garbitzera,
baina uste dut etorri dela
haserrea haunditzera
eta egizko demokratiko
prozesoa gelditzera.
Madril aldetik mintzatu zaigu
Hizketa oso suabez,
nola errege Juan Carlos jauna,
hala berean Suarez.
Gure Herria kiskali dute
diplomazko sugarrez.
Gain azala bai, aldatu dute
inoiz ere barrua ez.
Madrildik onik ezer guretzat
datorrenik ez pentsatu.
Bere mendean ez al ditugu
urte gogorrak pasatu?
Baina oraindik askok nahi du
haren musikaz dantzatu.
Ezin daiteke herririk hola
inolaz ere altxatu.
Eleziotan gertu zena
jakin nuen momentutik,
politikari jarraiki diot
ondotik edo gertutik
eta ezin dute kendu inolaz
hau nere pentsamentutik;
ezer lortzeko saia beharko
kaleko parlamentutik.
Euskal Herriko alderdi asko
harturik daduzka loak,
inoptizatzen dituelarik
Madril hortako magoak,
ala txaketa alda dutela
ditugu errezeloak
gero norbaitek estali behar
horien hankazuloak.
Bi puntutara zentratuko dut
nere atentzio dena,
oraindik orain euskal barruti
horrekin egin dutena.
Hor ikusten da soziologiz
ongi jantzirik daudena
Itxura asko eginagatik
gogoan betik lehena.
Beste puntea konkretatzen du
datorren autonomiak,
aurrez, badakit ez dituela
beteko gure premiak.
Are gutxigo separatuaz
Nafarroako semiak.
Hemen banatu han errezago
Madrili lotzeko biak.
Nolabait ere demostra nahi
gu ez garela Herri bat
lehen ere hau esaten zuten
ez da notizi berri bat.
Gure bizkarra ohiturik da
jasotzen beti harri bat,
baina ordea nola tolera
holako joku zerri bat?
Eta guzi hau demokrazien
izenean egin dela,
gu ez gaituzte engainatuko
afrikanoak bezela,
hemen hi eta gero etzera
han berpiztuko zirela.
Zer uste dute? Moroen garai
atzeratuen gaudela?
Madrilek ez du proposatuko
batasunaren babesa.
Nafarroako parlamentuak
ere joku aldrebesa
herrian berriz nabarmentzen da
kontzientzirikan eza,
baina hor dago lege guzien
gainetik naturaleza.
Aspaldi hontan entzuten dena
Nafarro ez, Nafarro bai,
egia esan ez gaude inor
Madrilek erantzungo zai
Arazo honi erantzuteko
gu bakarrik bait gara gai
infiltratuen laguntzarikan
ez dugu inoiz ere nai.
Sarri gera naiz beste aldeko
Nafarroari begira
Nafarroakin tratalariak
konpondu dira erdira.
Hemen ez dena euskal izena
han badaukate sikira,
baina hangoak baldin badira
hemengoak hala dira.
Joku maltzurrak izaten dira
politikaren kontuak,
baina gu ere ez dugu gero
hor izan behar tontuak;
ongi probetxa beren failoak
eta gure talentuak,
konbinatuaz estrategi ta
taktikazko momentuak.