Errenderi'ra begira nago
Iparragirre, Xanti
-1-
Errenderi'ra begira nago
urruti xamarretikan,
or jaio eta or azi nintzan:
aldegin nuen ortikan.
Irakurri det aldizkaritan,
entzun det irratitikan,
eun urte nola betetzen diran
«Xenpelar» il zanetikan.
-2-
Aren bizimoduan berri
ez naiz asiko ematen,
erreztasunik ez neukan eta
ez naiz ibili ikasten.
Baña umetan aitu genduna
oraindik nago ikusten,
«Xenpelar», zuri eskerrak nabil
gaurko bertsoak idazten.
-3-
Errenderi'ko baserri baten
zabaldu nitun begiak,
andikan laister senti nituen
bertsoaren egarriak.
Liburu eder bat ba-zeukaten
guraso maitagarriak,
amaika bertso eder ba-zitun
«Xenpelar» zanak jarriak.
-4-
Bertso ederrak datoz gogora
«Xenpelar» aitatutzian,
suondo artan entzundakoak
neguko arrats luzian.
Aita ezpazan anai zarrenak
abesten asiko zian,
nik irakurtzen ikasi nuen
zure bertsoen pozian.
-5-
Itz-neurtu asko galduko ziran,
ainbat urte dira jaunak,
gaur berriz aztertu nai lirake
zuk egin zenitun lanak.
Zure bertsoen muñaren billa
nekatu dira gizonak,
biotz barruan dute kabia
«Xenpelar'en» itz sakonak.
-6-
«Xenpelar maite, zuk urte gutxi
izan zendun lanerako,
utzi zenduen zer ikasia
ondorengoarentzako.
Gaurko jakintsu asko gabiltza
zerbaitxo bageralako,
zure lanikan ezin baztertu
aspaldikoa dalako.
-7-
Gaurko jakintsu askoren ustez
«Xenpelar» zertan goratu,
eskola gabeko baten lana
ez laike aintzakoz artu.
Baña begira jartzen diranak
ezin zaituzte baztertu,
bertsolari aren buru argia
gaur oraindik ezin neurtu.
-8-
Ezjakiñak gerala entzunda
ixilikan egon bear,
jakintsu lana irakurtzean
benetan egin det negar.
Amaika itz goxo abestu degu
euskal errietan zear,
bertsolariok bizi gerade
zu zeralako, «Xenpelar».
-9-
Gure izkuntzak kondaira zear
etsai asko izan ditu,
bertsolaria bezin lagun onik
euskerak ez du arkitu.
Ikasi gabeko jarraitzalle batek,
«Xenpelar», goratzen zaitu,
zuk landu zendun izkuntza xarrak
gu ere maite baigaitu.
-10-
Xenpelar, artu maitetasunez
Erritar baten omena,
Neure almenak eskeñitzean
Pozetan daukat barrena.
Euskal literaturak izan dun
Lagunikan jatorrena,
Aurrera zure izkuntz ederra,
Razatikan datorrena!
