Gotañe
Idiart, Roger
1
Agur zier jin zidenak khantarien behatzera
Heben auz etzütiegü debeaziren sobera
Gotañen arresti huntan bildü direnen aubera
Behin-behin ezta junen Xiberua gain behera.
2
Xiberun khantiak zunbat maite dütügün jakinik
Khantariak horra zaizkü zazpi probintzietarik
Egün entzünen tützie hantik bai eta hebentik
Laphurdi, Bizkai, Nabarra, Gipuzko ta Xiberutik.
3
Zalgiz Iruri, Lexantzün apheza die manexa
Xiberutarren erdian üdüri axuri beltxa
Hor dabila bere botza aski gore ezin altxa
Ahalaz phiztü beharrez hilik bezala den mitxa.
4
Gotañeko khantaldia sorthüz geroz düt jarraiki
Hirugerren urthia du bethatzen ezin hobeki
Gizon gazte batek deikü lagünekila eraiki
Irabarnen egoiten da: izena dû Maurice Hoqui.
5
Heben gainti khantaldia zen ondun «manex muda»
Urthe batetik bestila Xiberotartzen ari da
Gisa hortan Xiberua iratzartzen balinbada
Segür niz aisa diala irabaziren partida.
6
Iruri ta Mendikota, agur bat zor dügü bier
Hor badira khantariak, beha gitin hoien botzer
Errexinulak bezala khantüz ari zaizkü eder
Biakinen pare dira Etxahun ta Etxandiber.
7
Garazi aldetik ere jin zide egün khantari
Segür eginen deizie Xiberutarrek batzarri
Izen bat eman düzie zien saldo ederrari
Izen hoi züzen othe da?... Ezpeizide «Nekhez ari».
8
Berriz huna nitzaizie khantatzera zunbait berset
Bortiak bizi gai dila oihüstatüren deiziet
Bi basabürütar gazter agur bat igorten deiet
Santa Grazi, Ibar-eskuiñ: huna khantuz Hardoy-Sobiet.
9
Orai segür botzik nago nurbait presentatü nahiz
Kantari, teatrolari hunen adixkide beniz
Beste jokhalarieki kunparatzen hasten baniz
Ene ustez hoberena da Ugutz Robles Arangiz.
10
Bortian ihiztekako badira lekhü haitiak
Larrañeko bazterretan oro ebili nahiak
Gogo hunez esker mila, oi adixkide maitiak
Larrañetik hunat jinik, ziek «Orhiko txoriak».
11
Mügaz bestaldian ere jentiak üska badaki
Etxit ez ber mintzajia bena bihotzez gureki
Hego aldeko aiziak berotzen gütü goxoki...
Agur Uskaldün aurhidik: Bakartxo eta Iñaki.
12
Manexen adixkidantza eztezagün seküla gal
Lagün hun bat ez ditake tratian eros edo sal
Ene kobla ttipi huntan eztüt nik erraiten ahal
Zuiñen xarmagarri diren Carrere bai eta Ospital.
13
Uskaldünak, junta gitin Uskal-Herriaren aide
Bethi xede hortan, biga khantatzen ari dirade
Zuiñen eskualtzale diren erraitia da debalde
Nurk ez dütü ezagützen Etxamendi ta Larralde?
14
Orai gure khantaldia dügü huntan ürhentüko
Oroentzat ordü beita etxerat abiatzeko
Batak eztü lanik bene, bestik ardiak jeixteko
Dagün urthin berriz oro auz hunat zide bildüko.