Nere irratitxoa

Aierbe Iraola, Joxe

 Luma ongi zorroztuta,

 IRRATIA gai artuta,

 bertso batzuek jartzera noa

 merezi ditu-ta.

 Egun osoan piztuta

 batzuk erdi zapuztuta,

 gauean ere entzuten baitut

 oean sartuta.

 Goizean esnatutzean,

 belarriaren ertzean

 artuta entzun, naiz azkar jeiki

 ordua jotzean.

 Bein bat orrela oitzean,

 gaizki gabe gelditzean,

 orregatik nik eramaten dut

 bañura sartzean.

 Bañu-zuloko lanetan

 goizeko ordu oietan,

 badakizute eta ez noa

 esatera zertan.

 Ibili gabe ezertan

 IRRATITXOA an bertan,

 zeiñen ederki entzuten dudan

 ixiltasun artan!

 Albiste eta kantuak

 edo beste asuntuak,

 egiñez pozik pasatzen ditut

 antxe minutuak.

 Naiz ango pake santuak

 minutuak kontatuak,

 atea jotzen asten dira ta

 orduan kontuak!

 Lendabiziko ordena-

 "irten aal dan azkarrena",

 badakit larri iristen dana

 ara datorrena.

 Baiña pozik zegoena

 errespetatu aurrena;

 iñoren onik ezin eraman,

 ori da txarrena.

 Ala irteten naiz andik

 ia jantzi gabetandik,

 iñork kejarik izan ez dezan

 ortan neregandik.

 Beartu gabe iñondik

 esango ditut emendik,

 ondorengoak okerragoak

 baitira oraindik.

 Irratitxoa bitarte

 aspertuxea naukate,

 gu bion aurka, etxe ontan zer,

 demontre naukate?

 Nik uzte ba'dut nunbaite

 kendu egiten didate,

 nunbait lotuta erabiltzera

 beartuko naute!

 Naiko aserre egunez

 gauean zer esanik ez,

 oe-ertzera eramateko

 oitura dudanez.

 Atzekaldea emanez,

 bear danikan egin ez,

 loak artzen nau nere IRRATI

 kuttuna entzunez.

 Aldamenetik: "aizazu,

 bizio txarra daukazu,

 gaurko naikoa entzun duzu ta

 itzali ezazu.

 Ze senar klase zera zu?

 Zerbait pentsatu beazu,

 kaso geiago egin ezean

 alperrik naukazu".

 "Leen, oroitutzen ba zera

 amaika terdik aldera...

 gaur egun ez dan bezelakoa

 zan zure joera.

 Orain leengoa atzera,

 legezkoa da zaartzera,

 baiña azkeneko noiz egin gendun

 goatzen al zera?"

 "Nai baldin ba'dezu jakin,

 aserre nago zurekin,

 orrela ezin bizi gaitezke

 biok alkarrekin.

 Zure irratiarekin

 esango dizut zer egin:

 egunez entzun ezazu baiña,

 gauean nerekin".

 Adiskidetu gaitean,

 bizi nainuke pakean;

 tresna kaxkar bat dala medio

 aserre betean.

 Doiñu polit bat astean,

 ura entzun bitartean,

 bion gustua egin daiteke

 ederki batean.