Pantxoa zenari
Harinordoki, Jean L. (Laka)
1
Aurten otsaila jabetua zen hastapeneko egunez
Baigorriarrak goxatzen ari zirela ixiltasunez
Zorigaitzezko berria laster hedatu bide xuxenez
Jara mendia betea dela su hiltzale ta ainitzez
Xifrikaturik ari direla norbait ezin atxemanez.
2
Arratsaldean hurbildu zuten mendiari airezkoa
Bertze gizonen lana izanez arras debaldetakoa
Harek zezaken asma bazela gisa hortako zokoa
Pantxoak ere leku hau zuken oino ezagutzekoa
Eskuetarat erori zaiko bertze munduko gakoa.
3
Otikoronen Bidabehere baserri baten jabea
Hango semea ezagutu ez duenik nehor badea?
Hogoi urteko laboraria, langile paregabea
Azinden bila, leku gaixtorat heltzek ez herabea
Xabiereko San Frantses idek zozu zeruko atea!
4
Hortako doia ibili gira elgarturikan lanean
Aldi-guziez, beti konponduz modurik hoberenean
Auzor zerbitzu egile ere jendea eskas zenean
Miragarriko indarra lagun zuen eginkizunean
Zuhaitz ederra bilatua da den oihanik txarrenean.
5
Ofizio bat hertsigarria nun nahiko laborantxa
Ta bereziki here etxean daukanarentzat hazkuntza
Neholaz ere ezin ditaike estal egin duen hutsa
Hunen aitamak atsegabetik Jainkoak atera bitza
Agian heien bizia ez da bilakatu jasan gaitza.
6
Haren herriko elizan bazen hanbateko batasuna
Dolutzaleak kontsolatzeko holako bildutasuna
Gisa hortako gertakariek lotsatzen dute gizona
Froga dezala, ezin du ukan zinezko askatasuna
Heriotzeak munduan ate bat dauka: bakartasuna.
7
Lagun Frantxoa, ez daukuk egin hil aintzineko agurra
Hortaz badiat oraino egun nahigabe bat ederra
Nabarmena den errekontruak pizten deraukuk beldurra
Goiko mendeak bazikan segur hi bezalakon beharra
Laboraririk gabe nolako dugu biharko Nafarra?