Alexandre Bergouignan

Harinordoki, Jean L. (Laka)

 1

 Ibar huntako haritz eder bat nola zeraukun erori

 Orai bi egun barreatu da tupustez berri txar hori

 Hainbat laguntza eta kontseilu emanik jende askori

 Jaunak geriza dezan arima otoitzez gira etorri.

 2

 Asmatzen eta obratzen ditu iragan hainbeste urte;

 Bide berrien urratzailea, ukanik aski bertute;

 Bergouignan Jaunak atsedentzeko lasaitasunik baduke

 Abiatuak zituen sailek jarraikitzaile baitute.

 3

 Herrietako ontasuneri behatzen bazakiena,

 Mahastietan fede haundia betitik ukan duena,

 Jende guziak ongi bizitzen ikusi nai zituena,

 Gure eskerrik aditu gabe jin zaio azken orena

 4

 Gauden lurrean itzal gabeko gizonik ez dago nehor;

 Beti maitale eta ahaltsu izaitea bain da gogor;

 Bainan Alexandr, zure bizia izan da guziz emankor;

 Zu ezagutu zintugun gaztek ainitz baiterautzugu zor.