Mater Dolorosa
Garbi
Judar dongeak, erruki gabe,
Josi zuten gurutzian
Zeru ta lurren Jaun ta Jabea
Lapur gaiztoen erdian.
Ama zegoen zutik, nekatsu,
Gurutzearen oñean
Ikusirik ¡ai! illotzik Jesus
Zuru-lurraren artean.
¿Nork eman dio eriotz ori
Zeru ta lurren Jaunari?
¿Zergatik, Jauna, epai beltz ori
Ematen dizute zuri?
Jesus laztanak jayo ezkero
Etzun egin gauza txarrik,
Bere lagun ta etsai artean
Gauz-onak ugari baizik.
Maitetasunak ekarri zuen
Ludi ontara zerutik,
Gizon guztiak azkatutzeko
Deabruaren menpetik.
Maitasun onen erakuspena
Izan dezaten guztiak,
Agertzen ditu maiz ta ugari
Egipen arrigarriak.
Illak berpiztu, argitu itsuak,
Baita gaixoak sendatu,
Toki danetan on-beartsuei
Zorion asko zabaldu.
Gauz-onak baizik, egin ez arren
¡Au bai dala epai beltza!
Bere erritarrak eman diote
Gurutzeko eriotza.
* * *
Goazen irudiz Kalbariora
An dago Jesus zintzillik
Gorputz guztia zauriz beteta
Burua arantzaz josirik.
Esku ta oñak, odol jario,
Abe baten illtzaturik:
¿Nor egon leike negarrik gabe
Jesus orrela ikusirik?
An arkitzen da Jesus'en Ama
Gurutzearen oñean
Samintasunez, estu ta larri,
Seme laztana ikustean.
Begira zagun, nola dagoen
Maria guztiz garbiya;
Bere atsekabe ta biotz-miña
Benetan da izugarriya.
Egaria det: dio Jesus'ek:
¡Ta ezin eman asegairik!
¡Ama gaxua! ez du edarik
Begiko malkoak baizik!
Ama laztanak entzuten ditu
Semea'ren dei larriyak;
¡Ai! bañan ezin! ¡ezin arindu
Aren neke izugarriyak!
¡Au bai tamala! ¡au bai samiña!
Iñolare ezin lagundu!
¡Ill bear zayo Seme laztana!
¡Ill bear ta ezin laztandu!
¡Guzia egin da! ¡Dana bete da!
¡Ill da semerik onena!
Bere ondoan, or dago zutik,
Amarik larrituena!
Gogartu zagun Kalbariyoa
Ta ikusi irudimenez
Gertaerarik goibeltzuena
¡Jauna'ren Ama negarrez!
Begiratu, bai, Kalbariora;
An gure Amatxo laztana;
Zutik, neketsu, bakar-bakarrik:
Goazen, bada, beregana.
Ta auzpez jarririk bere oñetan,
Lagundu bere oñazean,
Bere laguntza izan dezagun.
Bizi geraden artean.
* * *
Bai, Amatxo, bai; oroitu gutzaz;
Lagundu ¡Ama gaxua!
Ta azken orduan, gure aide, Zuk,
Otoi ¡Ama neketsua!