Mattin bertsulari zenari
Fermin [Imaz, Fermin?]
1
Nere aldian kantatu nahi nuke Ahetzeko Mattin
Zure aldetik jin berri hitsak dener eman du bihotz-min
Zazpi probintzi hoietan zinen zu ezagutua, berdin
Eta gogoan egonen zira oraino luzaz gurekin!
2
Euskal jendea egun sendi dut egiten ainitz intzirin
Zu gabe gure Herria ez da berdina izanen behin
Gure zerua noiz zaiku bade berriz agerturen urdin
Zure gisako lore, berriak noiz ikusiko Lapurdin?
3
Zu bezalako bat ukaitea guretzat zen fagorea
Paregabeko izana baita beti zure omorea
Zurekin bestak hartzen zuela laster bere kolorea
Bihotz partetik diren alderdi hoiek balio urrea!
4
Xoko pollit bat; Ahetze dela, hor baitzinuen kabia
Keinka hits huntan, agurtuko dut, apal, zure familia
Zure oihua ez ote hauxe: «Zuen dohainez balia»?
Zeru ta lurren artean hola egin ditaike zubia...
5
Zure lagunen orroitzapena ere hunela badator
Berriz kausitu bide ditutzu Etxahun eta Xalbador
Maitasunaren arabera dut zueri otoitz ainitz zor
Bainan zeruan ez bazerate izango ahal da nehor?
6
Nere penaren gatik jostetan ari naiz naski oraino
Gure artean zuk bertzerik ez zinuen nai egundaino
Hementxe gaude Euskal-Herri hau altxa nahiz «zeruraino»
Eta bihotzez oral derautzut, Mattin, ikusi artino
Goxoagorik ez da izanen itxaropen hauek baino...